Во Тајланд не помина забраната за алкохол за Нова година

И покрај тоа што неколку тајлански национални комисии побараа забрана за продажба на алкохол за време на новогодишните празници и локалниот национален празник Сонгкран, властите објавија дека, барем за сега, нема да ја ограничуваат продажбата.

Поборниците на предлогот за забрана како главен аргумент ги наведоа податоците според кои лани во овие празнувања во Тајланд имало 367 загинати и 3.300 ранети во сообраќајни несреќи, најчесто предизвикани од алкохолизирани возачи.

Одлуката за слободна продажба ја потврди актуелниот министер за здравство Раџата Раџантавин, кој изјави дека Владата мора да го почитува мислењето на поголемиот дел Тајланѓани, кои се против забраната. Тој негираше дека одлуката е поврзана со неодамнешната изјава на сегашниот преоден премиер, водачот на државниот удар од 22 мај, генералот Прајут Кан-ока, кој рече дека нема никакви забелешки за тоа алкохолот да се продава за време на празниците.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.