Денеска се одбележува Меѓународниот ден на лицата со хендикеп

Претседателот Ѓорге Иванов денеска во резиденцијата „Вила Македонија”, по повод 3 декември- Меѓународниот ден на лицата со хендикеп, ќе ги прими учениците со посебни образовни потреби од ПОУ „Св. Климент Охридски” од општина Ново Село,

Денеска во Скопје ќе се одржи традионалниот хуманитарен концерт „Аплаузи“, тркалезна маса и промоција на филмот „Најдолгите секунди“.

Под мотото „Сакам да пеам, можам да пеам – сакам да свирам, можам да свирам и сакам да играм можам да играм“ во Универзалната сала ќе се одржи традионалниот хуманитарен концерт „Аплаузи“. Концертот е во организација на хуманитарното здружение „Кралицата Есма и Стево Теодосиевски“ во партнерство со Универзална сала, а ќе настапат деца од специјалните училишта, иснистуции и домови во Република Македонија. Покровител на третиот хуманитарен концерт „Аплаузи“ е министерот за труд и социјална политика Диме Спасов.

Центарот за Даунов сундром Меѓународниот ден на лицата со попреченост ќе го одбележи со промоција на филмот „Најдолгите три секунди“ во Кинотеката на Македонија. Филмот е на Ефтим Трајчов Ѓаурски, а главната улога е на 21-годишниот Гоце Маринковски, лице со даунов синдром од Штип. Филмот зборува за неколку аспекти од животот на лицата со даунов синдром во нашата средина, односот на другите луѓе кон нив и суровоста со која многумина секојдневно се соочуваат. Дел од настанот ќе бидат и фотографиите на Драган Гајиќ, Маја Аргакијева, Лидија Најдовска и Маја Јаневска-Илиева, кои првпат беа изложени на 21-ви март, Светскиот ден на Даунов синдром.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.