Во Македонија како да имаме култ кон јадењето. Јадеме кога славиме, јадеме кога тажиме, кога сме гладни, но и кога не сме, онака за друштво… Од друга страна, многумина од нас јадеме кога ќе стигнеме, честопати од нога, појадуваме попладне, ручаме кога е време за вечера, вечераме на полноќ. И тоа најкалоричното што ќе го најдеме во фрижидерот. Понекогаш ни тоа, туку оброците ни се двојни кафиња, десетици гуми за џвакање, соленки, смоки, чоколадо, чипс…
Како поминуваат годините, покажуваат истражувањата, порцијата со храна ни е сѐ пополна, а бројот на калории по чинија речиси сме го удвоиле. Пред 10 години една порција шпагети болоњезе имала 500 калории, а денес двојно повеќе.
Лекарите и нутриционистите порачуваат дека мора да се променат навиките, ако сакаме да го сочуваме здравјето и долго да живееме.
Не заспивајте со полн стомак
Брзото темпо на живот и бројните обврски ни ги диктираат сите дневни активности, па и оброците. Но тоа не значи дека не треба да се потрудиме да го најдеме нашиот оптимален распоред кога ќе јадеме. Најпрво и најважно што треба да направиме е рамномерно да ги распоредиме трите главни оброци и ужините во текот на денот. Рамномерното внесување храна го забрзува метаболизмот и се создава почест проток на енергија. И уште поважно, да не ги прескокнуваме главните оброци.
Д-р Дејвид С. Лудвиг, од Бостонската детска болница, која е дел од Универзитетот „Харвард“, вели дека е подобро да се изеде и мала количина храна еден час откако ќе се разбудиме или веднаш по станувањето од спиење, отколку да го прескокнеме појадокот.
Отсекогаш важело правилото дека појадокот е најважниот оброк, но тоа не значи дека уште нерасонети треба да го преполниме стомакот со висококалорична храна. Место да се прејадуваме, полесно и поздраво е да си воведеме мала ужина.
Времето за ручек го диктираат дневните обврски на секој од нас, што за повеќето луѓе значи дека ручекот паѓа во текот на работното време. За среќа, во последно време станува тренд на работа да се носи домашно подготвена здрава храна за ручек, па паузата за ручек може да биде и време пријатно поминато со колегите.
И времето за вечера не е помалку важно. Преполнетиот стомак со тешка храна може да нѐ разбуди и да го наруши нашиот биоритам. Затоа треба да се избегнуваат големи оброци во период покус од 2 до 3 часа пред спиење, вели д-р Карен Карлсон од Медицинската школа на „Харвард“.
Ако сме премногу гладни непосредно пред спиењето, тогаш можеме да изедеме парче овошје или парче зеленчук.
Не преполнувајте ги чиниите
Храната подготвена на пареа, салатите и овошјето се најздравата храна, но тоа не значи дека треба да претеруваме со нив. Како што со сè треба да се има мера, така треба и со здравата храна. Нема да му направиме поголемо добро дело на организмот ако во текот на денот изедеме 20 праски. Јаболко, круша или праска со средна големина или пак две сливи или две мандарини, што се околу 80 грама, се една сосема доволна порција овошје.
Парчето месо или риба не треба да биде подолго од 10 и пошироко од пет сантиметри.
Тестенините и белиот ориз, ако не се интегрални, се многу калорични, па би направиле голема грешка ако сервираме полни чинии со нив. Лекарите и нутриционистите за еден оброк препорачуваат шест лажици ориз, што е околу 75 грама, или девет лажици тестенини, што е околу 60 грама.
Ако јадете леб или некое печиво со секој оброк, тогаш границата нека биде едно парче. Истото важи и за порциите кекс или колачиња, што ги јадеме како ужина.
Млекото, сирењето и јогуртот содржат протеини и калциум кои се важни за коските и забите, но се и калорични. Затоа користете млеко, сирење и јогурт во ограничени количини.
Калориите одат со годините
Дневното количество калории што го внесуваме треба да биде пресметано во однос на полот и возраста. Според нутриционистите од Американското министерство за земјоделство децата на возраст од 2 до 8 години треба да внесуваат од 1000 до 1400 калории дневно. Девојчињата од 9 до 18 години треба да внесуваат од 1600 до 1800 калории, а момчињата на иста возраст – од 1800 до 2200 калории дневно. На жените од 19 до 30 години им се потребни 2000 калории, а на мажите на иста возраст 2400 калории. За мажите од 31 до 50 години се потребни 2200 калории, а за жените на таа возраст 400 калории помалку. Над 50-годишна возраст за жените се доволни 1600 калории дневно, а за мажите – 400 калории повеќе.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
