На чекор до нуклеарна војна

severna korea Северна Кореја поради новите санкции на ОН ги раскина сите договори за примирје со Јужна Кореја, како и директната телефонска линија за вонредни ситуации. Пјонгјанг повторно се закани со нуклеарна војна, а неговиот најголем сојузник Кина повика на смирување на тензиите, јави Би-Би-Си.

Во соопштението од Пјонгјанг се вели дека сите договори, како и примирјето постигнато меѓу двете земји во 1953 година по Корејската војна, ќе престанат да важат од понеделник и дека телефонската линија се укинува веднаш. Линијата првпат е воспоставена во 1971 година, а Пјонгјанг досега ја прекинуваше пет пати, последен пат во 2010 година.

Северна и Јужна Кореја технички сѐ уште се во војна зашто никогаш не потпишале мировен договор по конфликтот во 1953 година. Советот за безбедност на ОН завчера воведе нови санкции против Северна Кореја поради нуклеарната проба од 12 февруари. Пјонгјанг, како и неколкупати досега, се закани со превентивен напад врз САД, Јужна Кореја и сите други агресори.

„Односите меѓу Северна и Јужна Кореја ја поминаа опасната линија и повеќе не можат да се поправат. Нуклеарна војна може да избие секој миг“, порача Пјонгјанг.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.