Дизајнерски накит, интересна облека, везење во живо, плетени капчиња, шалчиња, ракавички, сè рачно изработено можеше да се купи денеска во Младинскиот културен центар (МКЦ), каде што е во тек целодневната прослава на 8 Март, празникот на поинаквата жена.
Сите оние што сакаа да им подарат малку поинаков подарок на саканите мајки, баби, тетки, наминаа во МКЦ да ги видат рачно изработените парчиња накит и облека, во кои е внесено многу љубов и внимание.
На работилницата „Практична жена“, инспирирана од иницијативата „Куварице“ на уметничката група „Шкарт“ од Белград, имаше везење во живо во соработка со Здружението „Домаќинки“ на Македонија од Скопје.
На базарот свои парчиња имаа ATAMI, Александра Шекутковска, LUDUS, „Драма студио“, Ивана Кнез, Нита Муча и Дафина Џепаровска, M craft’s, Wizаrt (Јасмина Главинче и Милена Крстева), Soro Jewelry (Андријана Андреева), Chic Undercowear, Плетени колачиња, Ultra Design Shop и Damaja.
Во МКЦ имаше и изложба на фотографии на Камка Тоциновски, Ѓорче Ставревски, Ана Јакимска, Иван Илиев, Наташа Гелева NeuErotik, Самир Љума, Катја Штркова, Димитар Апостолов, Менче Петреска и на Филип Пајдаков. За попладне беше планирано женски осврт на македонската кинематографија во соработка со Кинотека, потоа детско катче, кулинарски настан, а за крај на денот концерт на „Репетитор“ во „Денсинг салата“ на МКЦ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
