Пет сликовници, дел од проектот „Сите сме еднакви“ ги учат децата на права, одговорности, обврски

Сликовници што ги подобруваат социјалните врски меѓу децата во основните училишта беа денеска промовирани во скопското основното училиште „Лазо Ангеловски“ во општината Аеродром.

Делата се на пет авторки и автори од земјава и сите имаат различна тема. За тимска работа и фер игра пишува Александар Прокопиев во „Голманот Риско“, за права и за одговорности во општеството пишува Илина Јакимовска во „Бендот на Петко“ и во „Како Петко не си ги заврши обврските“ на Билјана Петревска – Малинова, потоа за еднаквост и за човекови права во „Приказна за Ото, Ото и Ото“ пишува Бистра Георгиева и за почитување и различност во мултиетничко општество во „Волшебната комета“ пишува Николина Андова – Шопова.

– Целта е да се развие едукативен, воннаставен модел, кој ќе промовира меѓуетничка и меѓукултурна интеракција и социјална врска меѓу децата од основно училиште (6-11 години) во Македонија – велат од организацијата „ОХО“, која го спроведува образовниот проект „Сите сме еднакви“, чијшто дел се сликовниците.
Проектот е со поддршка од Амбасадата на Велика Британија во Македонија, Министерството за образование и наука и Бирото за развој на образованието на Република Македонија.

Сликовниците се поделени во 21 основно училиште во Македонија и на крајот од сликовниците има и методолошки пристап при примена на сликовницата.  Сликовниците се наменети за учениците од одделенската настава при реализација на наставните содржини од предметите запознавање на околината и општество. Содржините во сликовницата и дадената методологија се во согласност со целите од наставната програма интегрирани со темата почитување и различност во мултиетничко општество.

– Секогаш е тешко кога се пишува за деца. Мојата сликовница „Волшебната комета“ е за почитување и различност во мултиетничкото општество и верувам дека токму ваквите идеи се чекор до промените – вели писателката Андова-Шопова.

Александар Прокопиев ја напиша сликовницата „Голманот Риско“ во која се говори за тимската и фер игра.

– Колку и да сме големи, сите сакаме да си играме. И децата и возрасните, сите нас нѐ држи радоста од играта. Ова се конкретни приказни од кои може многу да се научи – вели Прокопиев, едниствен автор меѓу четирите авторки на сликовниците.

Илина Јакимовска ја напиша сликовницата „Бендот на Петко“ во која се раскажаува за првата и за одговорностите.

– Јас секој ден пишувам многу, но ова е мој прв обид да пишувам во областа на детската литература. Мојата сликовница прв ја прочита мојот син Иван, кој има седум години. Кога таа „помина“ кај него, а Иван има многу висок критериум, тогаш верувам дека сликовницата ќе биде прифатена и кај другите деца. Убаво би било кога би имало вакви сликовници за средношколци, но и за студенти – рече Јакимовска.

На Бистра Георгиева и Билјана Петревска – Малинова овие сликовници им се прво пишано дело.

Георгиева ја напиша „Приказна за Ото, Ото и Ото“ и ја пренесува пораката за еднаквоста и човековите права, а Петреска – Малинова „Како Петко не си ги заврши обврските“.

– Верувам дека наставниците ќе ги пренесат пораките најдобро што знаат и умеат – вели Петревска-Малинова.

Илустратори на сликовниците се „Тхе Мичо“, кој го црта популарниот лик „Петко“, потоа Катерина Николовска, Марјан Димиќ и една позната шпанска илустраторка Моника Каретеро.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.