Иванов: Аргументите се на наша страна во спорот со Грција

Mакедонскиот претседател Ѓорге Иванов, коментирајќи ги последните изјави од Грција, изјави дека Грците имаат чувство дека многумина веќе не им веруваат бидејќи аргументите во спорот за името се на македонска страна.

– Грците реагираат нервозно. Изјавата на Венизелос укажува дека Грците веќе имаат некој страв, имаат некое чувство дека многумина веќе не им веруваат. Тие во 1993 година ја убедија меѓународната заедница дека користењето на името Македонија е безбедносна закана за регионот, без никакви аргументи. Сега другите членки видоа дека аргументите се на наша страна, дека Грција со тоа што нè блокира е таа што создава безбедносен проблем во регионот – рече  претседателот Иванов во интервју за телевизија „Сител“, осврнувајќи се на грчките реакции по неговиот настап на 69. Генерално собрание на Обединетите нации и пред Советот за безбедност.

Во однос на престојниот извештај на ЕК за напредокот на Македонија, шефот на државата смета дека извештајот нема да биде негативен, но ќе има забелешки за политичкиот дијалог, институционалното функционирање и неколку други.

– По мојата посета на Брисел јас ги повикав на средба сите лидери на опозицијата, без присуство на медиуми за лично да им ги пренесам пораките од Европа, кои сега, веројатно, ќе бидат забележани како негативни за Македонија. Тие од тогаш до денес немаат направено ништо по однос на мојата покана. Ниту некој од нив контактирал со мене, нити побарал средба, нити пратил допис до кабинетот – изјави Иванов.

Европската унија, како што наведува,  се соочува со сериозни тешкотии внатре.

– Ако ја погледнете нивната економија ќе ви стане јасно сè. За пет години од сега не знаеме во каква форма ќе биде ЕУ, но тоа што јас постојано им го повторувам на сите меѓународни фактори е дека со затворањето на проширувањето не само што кај граѓаните се зголемува разочараноста, туку се намалува и мотивирачката моќ за реформите што треба да се спроведуваат – вели претседателот Ѓорге Иванов.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.