Неговото високопреосвештенство, митрополитот повардарски, г. Агатангел во интервју за „Република“ предупредува дека неколкумина српски црковни великодостојници сакаат да го урнат мостот меѓу Српската православна црква (СПЦ) и Македонската православна црква (МПЦ), што, пак, ќе има долгорочно негативно влијание врз односите на македонскиот и српскиот православен народ, а индиректно ќе ги обременува и политичките односи на двете држави. Тој ја образложува суштината на спорот меѓу двете цркви и основата за некаков црковно-судски прогон на македонскиот архиепископ. Владиката Агатангел изразува жалење што во моменти кога светот се соочува со агресивен ислам и со милитантен богоборен секуларизам, ние, православните Македонци добиваме удари токму од истоверните браќа од север, југ и од исток, но во исто време тој верува дека Македонците ќе излезат од ова искушение прочистени и зацврстени.
Ваше високопреосвештенство, живееме во време на големи геополитички превирања, проследени со војни и огромни човечки страдања. Kолку Црквата, со нејзината духовна мисија, може да придонесе за мирот и за помирувањето во светот?
АГАТАНГЕЛ: Љубовта и радоста се темелите врз кои е изградена основната Христова порака. Преку овие две крила на вистинската и здрава духовност најдобро може да се разбере смислата на доаѓањето на Исуса Христа – Синот Божји, кој се воплоти за да му даде мир на човештвото и да го врати неговото загубено достоинство. Низ целата свештена историја, почнувајќи од книгата Битие, па сѐ до Откровението, читаме како Бог дејствува на планот на мирот и помирувањето, согледуваме како тој постојано создава врски, ги лечи и обновува кога тие на некој начин ќе се раскинати. Следбениците Христови, неговите апостоли и ученици, беа непосредни сведоци на неговиот живот и смрт и на неговото славно воскресение. Преку нив и нивната мисија за навек ни останаа во духовно наследство вечните и непропадливи Христови вредности и поуки. Апостолите станаа солта на светот, тие го раширија словото божјо, ја создадоа црквата, која како тело Христово стана блажено прибежиште на мирот, надеж за загубеното и духовно пропаднатото човештво и духовна тврдина на вистината. Тие што ја возглавуваат и раководат црквата Христова низ вековите, па и секој нејзин поединечен член, треба преку збор и видливи дела да бидат сведоци на новата духовна реалност, поттикнувајќи и утврдувајќи ги во својата животна средина начелата на мирот, љубовта, меѓусебната почит и разбирањето. Што значи, наша основна задача како наследници на апостолите, но и како духовни водачи на својот народ, е да ги облагородуваме човечките души промовирајќи ја на секој план и во секоја пригода радоста на животот во заедница со Бога. Тој што работи спротивно на овие начела е лицемер, користољубец и духовен слепец – одвратност на запустението што го запоседнува светото место, состојба која самиот Господ Исус Христос ја пророкувал дека ќе се случи пред крајот на светот (Мт. 24, 15).
Помина повеќе од една деценија по неуспешниот обид на СПЦ да инсталира сопствена црковна епархија во Р. Македонија. Деновиве, преку својата веб- страница, со соопштение објави дека планира да поведе судска постапка против поглаварот на МПЦ-ОА, г.г. Стефан. Како гледате на таквиот развој на настаните?
АГАТАНГЕЛ: Денес, место да се пофалиме со тоа дека со божја помош сме извојувале нова духовна победа, дека сме изградиле некој нов духовен мост на помирување, почит и разбирање меѓу народите, ние со огромно жалење ќе мораме повторно, по кој знае кој пат, да полемизираме и да се докажуваме со неколкумина српски црковни великодостојници со чии умови и срца имаат загосподарено озлобеноста, ароганцијата и високото мислење за себеси, и кои во последните дваесетина години се директни учесници и инспиратори на сите немири и недоразбирања на Балканот. Токму тие духовни деструктивци и пиромани решиле да го урнат мостот меѓу Српската и Македонската православна црква, што ќе има долгорочно негативно влијание врз односите меѓу македонскиот и српскиот православен народ, а индиректно ќе ги обременува и политичките односи на двете држави. Долги години бевме сведоци на нивниот арогантен и надмен однос кон Македонската православна црква, но и кон Македонците воопшто, но никогаш не престанавме да се надеваме дека ќе дојде време кога Господ Бог ќе ги вразуми да прифатат дека Македонија и Македонската православна црква се реалност и дека македонскиот и сите други православни народи што живеат во Република Македонија ја избрале црквата и да го остваруваат своето спасение преку Македонската православна црква. Тие никогаш не престанаа да го навредуваат македонскиот народ отворено, јавно и со погрдни зборови, но ние сето тоа го трпевме имајќи ги пред себе евангелските начела на духовноста. Врв на нивната злоба и надменост беше обидот преку уцена и одозгора, надвор од секој канонски ред, да му се наложи на народот кој ќе биде неговиот духовен водач, неговиот духовен пастир. Искрено се надевавме дека ќе ги видат лицемерието, докажаното разбојништво и лошиот углед меѓу верниот македонски православен народ на кандидат предложен од нив, но тие одлучија дека заслужува да стои од десно на нивниот патријарх не водејќи грижа за презирот што го предизвикува и кај верниците и кај неверниците. Откако видоа дека нивниот богоборечки план на разнебитување не успева, туку, напротив, и македонскиот и српскиот народ продолжуваат да си помагаат во неволјите, да се радуваат на успесите на другиот и да се почитуваат меѓусебно, тие решија дека е време за нов театар на нечестивоста, решија дека е време да го испукаат последниот плутон на пеколот, овој пат насочувајќи го во срцето на македонското православно битие, кое е возглавено и оличено во архиепископот македонски.
Може ли да ни образложите која е суштината на спорот меѓу СПЦ и МПЦ, што доведе до таков развој на настаните и дали има основа за некаков црковно-судски прогон на македонскиот архиепископ?
АГАТАНГЕЛ: Најновите обвинувања и настојувања за судење на неговото блаженство, архиепископот охридски и македонски, г. г. Стефан, се безпредметни, антицрковни и целосно неканонски. Повеќе пати е зборувано и детално е образложено дека, по долги анализи и усогласувања од двете страни, осамостојувањето на Македонската православна црква, поточно на тогашните три македонски епархии, е потврдено со одлука на Светиот архиерејски собор на СПЦ од јуни 1959 година, во која дословно се вели дека СПЦ се согласува епархиите во Република Македонија да се издвојат во самостојна црква која ќе се управува со Уставот донесен на македонскиот Црковно-народен собор од 1958 година и дека со таа одлука престануваат да важат прописите на Уставот на СПЦ за епископите и архиереите во Република Македонија. Оттогаш, па сѐ до денес МПЦ самостојно продолжува да го развива и збогатува христијанскиот православен живот во нашата татковина формирајќи свои образовни и хуманитарни институции, осветувајќи илјадници цркви и манастири, каде што секојдневно се богослужи света божествена литургија на која се гради живата црква, составена од конкретни личности, кои активно живеат и се движат нанапред во духовноста. Токму овој верен македонски православен народ на истата света литургија го избра својот архиепископ, својот духовен авторитет и секое негирање на тој канонски поредок е безобразно и лицемерно омаловажување и грубо мешање во внатрешните работи на една автокефална, односно самостојна црква. Во 34. апостолско правило се вели дека епископите на еден народ треба да изберат свој поглавар со кого ќе се советуваат и кој, исто така, ќе го почитува нивното мислење. Ние го избравме и го знаеме нашиот поглавар. СПЦ не може да му суди ниту на еден обичен верник во Македонија, а камоли на поглаварот на МПЦ бидејќи нема ниту фактичка ниту правна надлежност над оваа црква. Тоа што преку архиепископот г.г. Стефан нѐ обвинуваат за „упорно останување во раскол“ е обвинение кое треба да си го постават и себеси бидејќи тие упорно го одржуваат расколот меѓу двете цркви. А, кога лицемерно тврдат дека работат на „лечење на расколот“, всушност подразбираат насилно и наметнато решение кое нема никаква реална и пастирска основа, туку е полно со омаловажување, пред сѐ, на национална база. На тие луѓе им пречи сѐ што е македонско, тие се продолжена рака на мрачните политички сили кои со векови ги држат народите на Балканот во постојана тензија и немир. Лицата им се како на светци, но во срцата се волци, зборовите им се како бисери, но делата им се полни со црнила.
Врз основа на кои историски постулати е втемелена автокефалноста на МПЦ?
АГАТАНГЕЛ: Во 17. правило на четвртиот Вселенски собор се вели дека организирањето на црковните области треба да биде соодветно на државното и на граѓанското организирање. Ако тоа правило важи за новоформирани црковни заедници или епархии, колку ли повеќе ќе треба да важи за нас, македонските православни христијани. Македонија е самостојна и независна држава повеќе од 20 години, а христијанството во Македонија го имаат проповедано самите апостоли. Впрочем овде, во Македонија е формирана првата црковна заедница во Европа. Во Македонија континуирано постои организиран црковен живот, од апостолско време, преку архиепископијата Јустинијана Прима и Охридската архиепископија, па сѐ до современата возобновена автокефална Македонска православна црква. Христијанството од Македонија изродило многубројни светители и духовни великани, кои со своите благочестиви дела го задолжиле светот и врз чии духовни темели почива европската цивилизација. Според тоа, апсурдно и беспредметно е денес ние да му докажуваме некому колку сме подготвени црковно да се организираме и устроиме. Нашите корени се доволно длабоки. Насадени сме на добра духовна почва, која давала и ќе даде богат духовен плод.
Ги спомнавте каноните. Дали би можеле накратко да ни го објасните нивното општо значење, но и допирните точки кои тие ги имаат во контекст на овој повеќедецениски меѓуцрковен спор?
АГАТАНГЕЛ: Светите канони се применетото искуство на црквата, запишано од светите отци, нашите славни претходници и духовни патријарси. Тие се нашето духовно богатство, нашиот патоказ за правилно устројство и организирање на Црквата. Низ вековите Црквата се потпирала, ги толкувала и ги спроведувала светите канони, запазувајќи ги на тој начин мирот и поредокот во себе. Секој обид за отстапки од тие духовни патокази е погубен за правниот и за моралниот поредок на една света соборна и апостолска црква. Каноните постојат од апостолско време и се надградување, толкување, објаснување и спроведување на самите евангелски начела. За жал, кон Македонската православна црква и во минатото, а особено сега за време на нашето возобновено автокефално дејствување, се направени многу престапи кои ги санкционираат светите канони. Во интерес на просторот, ќе споменам само неколку еклатантни примери на погазување на канонските правила. Така, во осмото правило од третиот Вселенски собор, во 9. правило од Антиохискиот и во 64. и 67. правило од Картагинскиот помесен собор се вели дека епископот не треба да ја простира својата власт над друга епархија. Во 20. правило од четвртиот Вселенски собор на епископот му се забранува да проповеда јавно во друг град, а во 11. правило од Сардикискиот помесен собор тоа особено му е забрането ако со својата проповед го понижува месниот епископ. Во 14. Апостолско правило на епископот му се забранува да преминува и да дејствува во друга епархија, освен со писмена согласност на надлежниот епископ (13. правило од Анкирскиот помесен собор). Доколку некој епископ дејствува самоволно, без благослов и спротивно на споменатите правила, тогаш сите негови претходни дејства се неважечки (14. и 35. Апостолско правило, 15. правило од првиот Вселенски собор, 2. правило од вториот Вселенски собор, 5. правило од четвртиот Вселенски собор, 13., 21. и 22. правило од Антиохискиот собор, 1., 2. и 3. правило од Сардикискиот собор, 59. правило од Картагинскиот собор). Постојат и други канони што му забрануваат на епископот да ја простира својата власт надвор од својата дијацеза, како што е 8. правило од третиот Вселенски собор, каде што на многу јасен начин се опишува ситуација од 5 век, која е многу слична на денешната во Македонија. Постојат и многубројни канони кои, покрај правни, санкционираат и други престапи кон нас, како што се канони за своеволно напуштање на епархиите или црквите и манастирите без благослов на надлежниот митрополит или архиепископ. Канони кои забрануваат правење заговори и смутови против епископот, но и против народот. Канони кои забрануваат навреди и клеветење епископи, како и канони кои не дозволуваат избрзани ракополагања на епископи, не внимавајќи на нивното образование и на нивната возрасна и духовна зрелост, нешта кои СПЦ докажано не ги почитува и редовно ги превидува, а кои поради ограничениот простор не можеме да ги наведеме детално.
И покрај сѐ, дали гледате можност за решение на овој спор. Што имате да им порачате на македонските православни верници по повод овие настани?
АГАТАНГЕЛ: Тоа што не е можно за човекот, е можно за Бога. Тогаш кога нема на повидок никакво решение за надминување на проблемот, Бог со својата спасителна промисла секогаш ќе ни понуди најдобро решение, доколку сме доволно искрени и отворени да ја прифатиме неговата волја. Ова е проверена состојба и често била применета низ искуството на Црквата. Црквата низ својата бурна историја надживеала и победила и поголеми искушенија од тие што се актуелни денес. Светите отци велат дека ако нема искушенија, тогаш ќе заспиеме читајќи го Светото писмо. Во време кога светот се соочува со агресивен ислам и со милитантен богоборен секуларизам, кој не признава ништо друго освен профит, жално е што ние, православните Македонци добиваме удари токму од истоверните браќа од север, југ и од исток. Но, Македонците се духовно силни и богати луѓе, кои обединети околу својата духовна мајка – светата Македонска православна црква – и кои држејќи се цврсто за начелата на верата и на христијанската љубов ќе ја победат оваа наезда на лицемери и нурнувајќи се во печката на искушенијата ќе излезат прочистени, зацврстени и блескави како духовни дијаманти. Единството е нашата сила. Почнувајќи од единството на Светиот синод на нашата света Македонска православна црква, како и на сиот македонски народ, обединет со цврст став и јасна мисла околу овој наметнат проблем. Каде што има слога, има и Бога. Господ Бог, неговата света Мајка, св. Климент, св. Наум и сите македонски светители нека бидат наши заштитници и закрилници.
Од длабочината на својата душа го молиме нашиот македонски православен народ цврсто и непоколебливо, впрочем како и секогаш низ нашата славна и бурна свештена историја, да застане на браникот на нашата заедничка мајка – Македонската православна црква.
Разговараше: Ненад Мирчевски
(Интервјуто со митрополитот повардарски, г. Агатангел, е објавено во 108. број на неделникот Република, 26.09.2014)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Последни
-
Сензационално: Северина се разведува од Игор, поради познатата водителка!
-
Фатална сообраќајка кај Струмица: Со „Корса“ излетал од патот, загинал на лице место
-
Шон Пен во Истанбул: Ќе снима документарец за убиениот новинар Џамал Кашоги (видео)
-
Димитров: Зборовите „нација со комплекс“ се извадени од контекст
