Расчистена кражба – го „олеснила“ чичко ѝ за 70.000 eвра

ПС Гостивар ја расветли тешката кражба на златен накит извршена на почетокот на месецов во куќата на 54-годишниот Ј.Ј. во гостиварското село Чајле и вчера кривично пријави две лица, 18-годишната С.Ј. од Чајле и нејзиниот врсник А.И. од Чегране.

Двајцата, кои биле во љубовна врска,  се сомничат дека на четврти овој месец, во попладневните часови, со возилото на А.И. пристигнале пред куќата на Ј.Ј, инаку чичко на С.Ј. и искористувајќи го отсуството на домашните, влегле низ незаклучената врата, а потоа од регал од спалната одзеле поголема количина разновиден златен накит, чија вкупна вредност се проценува на 4.290.000 денари, или скоро 70.000 евра.

Златниот накит го зел А.И, но при претрес на неговиот дом реализиран  со наредба на судија во претходна постапка на 14-ти, пронајден е во дворот на куќата сокриен под едно дрво и покриен со лисја и сено.

Во координација со јавен обвинител, двајцата осомничени приведени се и задржани во Полициската станица Тетово, додека вчера определен им е 48 часовен притвор.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.