Сестрите Гордана и Наталија Винчиќ се уметнички тренери, специјализирани за иконографско, византиско цртање и за користење иновативни техники и бои направени од еколошки и природни материјали. На почетокот ни ја раскажаа легендата.
Легендата за настанувањето на градот Скопје вели дека многу одамна постоел еден јунак што нема име и го викале тој Со Копје, Со Копје, тој С’КОПЈЕ и на крајот самиот град го нарекле Скопје според овој јунак – ни раскажаа сестрите Гордана и Наталија Винчиќ, кои оваа легенда ја претставуваат со седум слики на изложбата под наслов „Лицата на Александар и градот со седум капии“.
На изложбата се претставени 20 уметнички дела, кои се проследени со прикази што носат пораки за набљудувачот. Проектот се состои од два дела: Лицата на Александар и капиите на градот Скопје. Ова е нивна трета самостојна изложба. Претходно изложувале во Шведска и во Русија.
Вашата изложба е насловена „Лицата на Александар и градот со седум капии“. Како дојдовте до идејата да ги поврзете овие два елемента?
– Александар Македонски (Александар Велики) бил успешен стратег и освојувач, посебно почитуван поради cвојата огромна желба да ги обедини луѓето, а не да ги раздвојува. Неговата поранешна унија и стратегии на владеење се многу слични со тие од денешната Европска унија – велат сестрите Винчиќ.
Сликите кријат многу симболи и пораки. Како набљудувачот да дојде до нив?
– Во нив постојат многу симболи и скриени пораки, кои ќе го инспирираат набљудувачот да гледа подлабоко во светот на симболизмот и да го најде своето вистинското богатство. Секоја слика e проследена со кратка историја, која е поврзана со луѓе или ситуации од Македонија. Толкувањето на Александровите увиди ќе биде во главата на набљудувачот. Веруваме дека овие уметнички дела ќе создадат нова платформа за натамошен дијалог – ни објаснија Гордана и Наталија.
А капиите на градот?
– Веруваме дека овие дела се вооружени СО КОПЈЕ, исто како јунакот од легендата, и со него ќе ги отворат капиите на градот. Посветивме четири години од нашиот живот за да ги пронајдеме клучевите од седумте капии што водат кон успешен живот. Ние ги најдовме клучевите истражувајќи ги внатрешниот и надворешниот свет на симболите каде што нивното човеково толкување беше главен водач. Седумте капии се, всушност, најважните домени во животот на секоја индивидуа. Тие седум симболични капии претставуваат влезови преку кои индивидуата ги преминува пречките и блокадите за здрав живот, самодоверба, самопочит, креативност и самоостварување”.
Од каде инспирација за ваква тема? И во каква техника се работени делата?
– Инспирацијата ја добивме низ средби и ситуации што ги доживуваме во Македонија. „Седумте капии“ се создаваа во Шведска последниве четири години. Сите дела се изработени на ленени платна со јајчена температура и со акрил. Цртани се во иконописна техника, стилски, симболично ги претставуваат различните моменти од овие простори. Содржат еден мултиетнички спој, а, сепак, се претставени на еден модерен начин со симбиоза на повеќе техники и стилови.
Очигледна е љубовта кон историјата, уметноста, археологијата….
– Точно. Неизбежно е да се нагласи влијанието и поддршката што ја имаме од нашата мајка, Марија Петровска – Винчиќ, која како ликовен уметник ни ја всади љубовта кон уметноста и ни ги откри тајните на сликарството. Но, исто така, свое учество има и нашиот татко, Живоин Винчиќ, кој по професија е археолог, специјализиран за антиката и кој постојано нѐ носеше на локалитетите каде што се вршеа ископувања во Македонија. Од него научивме за митологијата, симболите, традицијата и други интересни приказни од минатото. Токму тој ни ја разви огромната желба за истражување и љубопитноста за несекојдневни и невообичаени настани.
Гордана живее во Шведска, а Наталија во Грција. Дали и таму уметноста е ваша преокупација?
– Во Шведска ги завршив студиите за социјална работа на Универзитетот во Лунд, а потоа останав да работам во социјалниот сектор на државата. Наталија, пак, во Грција ги заврши студиите за применета уметност, а подоцна се усоврши во иконографијата и реставрирање стари икони во Скопје. Во Грција таа 15 години работеше на сликање икони и фрески, а водеше и своја галерија. Денеска таа го совладува дури и ѕидното сликарство. Работиме заедно, но делата ги користиме како важен дел во терапевтската дејност со индивидуи и групи, а средствата ги донираме во хумани цели и тоа најчесто за деца без родители – раскажува Гордана.
(Пишува: Невена Поповска | Фото: Ѓорѓи Личовски
Текст објавен во 105. број на неделникот „Република“, 5.09.2014)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Последни
-
Сензационално: Северина се разведува од Игор, поради познатата водителка!
-
Фатална сообраќајка кај Струмица: Со „Корса“ излетал од патот, загинал на лице место
-
Шон Пен во Истанбул: Ќе снима документарец за убиениот новинар Џамал Кашоги (видео)
-
Димитров: Зборовите „нација со комплекс“ се извадени од контекст