Во брзо време нема да може да се укинат визните олеснувања за земјите од Западен Балкан, бидејќи Европскиот совет и Парламентот се уште не постигнале согласност за тоа, изјави еврокомесарката за внатрешни работи Сесилија Малмстрoм.
– Механизмот за суспензија на олеснувањата се уште не е усвоен поради несогласувањата во законодавните тела, а треба да се види дали тие воопшто можат да се решат, истакна Малмстрoм во Брисел.
Повеќе членки на ЕУ, на чело со Германија, минатата година повеќе пати побараа на земјите од Западен Балкан, од каде потекнуваат голем број од лажните азиланти, повторно да им бидат воведени визи за патување во државите од Шенген зоната.
Меѓутоа, утврдено е дека механизмот за укинување на визните олеснувања, кој ЕК одамна го предложи, не може да помине низ Советот и Парламентот поради несогласувањата во врска со вториот амандман кој е дел од истиот пакет, кој се однесува на барањето на Чешка да се воведат визи за Канаѓаните, а кој мора да се усвои по принципот „сите или ниеден“.
– Проблемот на реципроцитет се уште не е решен, додаде Малмстрoм, укажувајќи на овој амандман.
Канада, откако чешките Роми почнале масовно да бараат азил во оваа земја, воведе визи за сите граѓани на Чешка, која потоа побара ЕУ да им возврати на Канаѓаните со иста мерка.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
