Браќа што биле на дијализа добија нови бубрези

Двајца браќа што подолго време биле на дијализа, пред два дена добиле нови бубрези на Клиниката за урологија каде што им била направена трансплантација од дарител со мозочна смрт. Проф.д-р Аспазија Софијанова, национален координатор за трансплантација, објасни дека годинава ова е трета по ред кадаверична трансплантација, а вкупно шест пациенти добиле нови бубрези. Таа рече дека браќата, родени во 1985 и 1987 година, одлично ги прифатиле новите органи.

-Целата постапка траеше повеќе часови, односно вадењето на органите од дарителот почна во 15 часот, а последната трансплантација заврши ноќта на полноќ. Пациентите добро закрепнуваат, и за неколку дена ќе ги пуштиме дома- вели проф. д-р Михаил Пенев, директор на Клиниката за урологија.
Д-р Александар Шиколе, директор на Клиниката за нефрологија, објасни дека еден од пациентите кому му беше пресаден бубрег бил повеќе од пет години на дијализа, а вториот околу 2,5 години.
-По селекцијата на можните кандидати, ги одбравме оние што најдобро им одговараа органите и оние што се во најдобра здравствена состојба да ја поднесат трансплантацијата. По трансплантацијата и од жив донор и од кадавер примателите на органи до крајот на животот треба да примаат терапија со имуносупресори под наш надзор- рече д-р Шиколе.
Во моментов во земјава 1.300 лица се на дијализа, а 250 се ставени на листата за чекање за трансплантација. Д-р Шиколе објасни дека дел од бубрежно болните што се на дијализа, поради други здравствени проблеми не може да бидат кандидати за трансплантација, а оти мал дел од нив одбиваат да се најдат на оваа листа.
-До крајот на годината, листата за трансплантација треба да се прошири на 400, односно да се направи типизација на уште 150 пациенти, а понатаму уште да се проширува. Годишно имаме околу 170 нови бубрежно болни на кои им е неопходна дијализа или нов орган, но со оглед на смртноста кај оваа група болни, вкупната бројка годишно се зголемува за 70-ина нови пациенти- рече д-р Шиколе.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.