Филе со порака до Србија и БиХ „Превенцијата е поевтина од санацијата“

Европскиот комесар за проширување Штефан Филе денеска изјави дека одговорноста за обнова од поплавите пред се е на Србија и на Босна и Херцеговина, кои треба да се вклучат во регионалните и европските програми на одбрана од природни катастрофи.

– Превенцијата е поевтина од санацијата по несреќите. Секогаш се исплатат инвестициите во превенцијатра, посочи Филе на отворање на Донаторската конференција за обнова на Србија и на БиХ по поплавите во мај. Тој наведе дека за шест месеци ќе се организира уште една конференција на која ќе се види што е направено од парите собрани денеска.

– За Европската конференција голема чест е што ја организира конференцијата, но одговорноста за примена на средствата е на корисниците, рече Филе. Предупреди дека поради глобалното затоплување може да се очекуваат природни катастрофи и затоа на регионално ниво треба да се направи систем на заштита.

– Србија и БиХ треба да се вклучат во европскиот систем за цивилна заштита, за да се усвои најдобрата пракса, да се хармонизираат процедурите со земјите-членки на ЕУ и на тој начин да се развијат капацитетите за сопствени механизми на заштита, истакна Филе.

Европската комесарка за хуманитарна помош и вонредни ситуации Кристалина Георгиева наведе дека Србија и БиХ не се сами во соочувањето со последиците од поплавите.

– Европа во последните 13 години имаше поплави колку за претходните 200, посочи Георгиева, додавајќи оти е уверена дека европските земји заедно можат успешно да се спротистават на секоја ситуација.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.