Македонски војници со македонско знаме ќе дефилираат на Елисејските полиња

Mакедонски војници, како и четворица млади од Македонија, со македонското знаме денеска ќе продефилираат на Елисејските полиња на официјалната воена парада со која се слави францускиот национален празник 14 Јули. Темата на прославата е 100-годишнината од почетокот на Првата светска војна, а на неа ќе учествуваат 76 нации, јавува дописникот на МИА од Париз.

Македонското знаме, заедно со знамињата на уште 75 други земји, кои  директно или индиректно учествуваа во Првата светска војна, ќе парадира на Елисејските полиња пред почесната трибина на претседателот Франсоа Оланд и претставниците на земјите-учесници на прославата. Ќе биде носено од македонски војници и ќе биде меѓу првите кое ќе поминат на Елисејските полиња. Учеството на парадата е за да се потсети на жртвите на војниците и на сите оние кои биле вклучени во Првата светска војна.

По дефилето на знамињата ќе парадираат француските воени школи и припадниците на единиците кои зедоа учество во Големата војна со порака: „Тоа се истите луѓе, кои ги бранат истите вредности како во 1914 година“.

На крајот од воената парада ќе биде изведена точка од 300 млади од земјите кои беа вклучени во Првата светска војна, меѓу кои и четворица од Македонија. Точката посветена на мирот ќе биде со музика на Моцарт и пуштање гулаби.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.