Галичник – место каде што се раѓа љубовта

Црквата Свети Петар и Павле во Галичник беше претесна да ги прими гостите и посетителите кои дојдоа да ја слават љубовта меѓу Ана Гареска и Иван Сариевски и Стефан Куковски и Маргарита Ивановска, кои денеска се венчаа на Галичката свадба. Првпат од возобнувањето на традиционалната свадба во едно од најпознатите села во Западна Македонија се случија две венчавки. Тоа не е невообичаено за минатото, кога на Петровден во Галичник, кога селото се уште било живо имало и по 50 венчавања. Со оваа двојна веселба се прати порака да се слави љубовта.

Денеска е 13 јули, Павловден, а селото повторно беше полно со луѓе, дојдени од секаде, да присустуваат на најавтентичната македонска свадба. Стари и млади галичани, потомци чии вредни дедовци и прадедовци го прославиле ова село, нивни гости, пријатели, роднини дојдоа да уживаа во венчавката, да ги видат обичаите, да се напијат студена планинска вода…

– Галичник е местото каде што се раѓа љубовта. Јас и Стефан се запознавме во Скопје, но нашата љубов се разви во Галичник. Затоа сакам ова место да го направиме храм на нашата љубов – вели Ивановска, која сега веќе се презива Куковска.

Пред неколку илјадната публика, на платото беа изведени обичајот бричење на зетот, на строј, кршење на „шутката“, невестата го заигра невестинското оро и други обичаи.

– Секој агол од Галичник е посебен. Секое камче, патче и агол дише од спомени и од убави мигови од најраното детство, па досега. Ние не се запознавме во Галичник, но на различен начин сега одново заедно го доживуваме, создаваме нови спомени – вели Ана Гареска, сега веќе Сариевска.

На платото пред чешмата Упија, играорците на „Фолклорни бисери“ од Скопје, ги ориграа ората „Тешкото“, симболот на непокорот и пркосот на македонскиот народ и желбата да се изборат за подобар живот, како и „Невестинското“ и „Манукот“.

фото: Игор Ангеловски

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.