Близнаци родени на 24 дена растојание

Кога Линдалва Дасилва влегла во 24 недела од бременоста добила контракции и почнала да се породува. Лекарите се обиделе да ги сопрат контракциите, но немало успех во тоа.

Д-р Сабрина Крајго, шеф на одделот за Мајчинска фетална медицина, ја информирала за можноста да го роди едниот близнак, а другиот да се задржи во стомакот ако тоа го дозволуваат условите на породувањето.

Дасилва мислела дека тоа е апсурдно и рекла не.

– Мислев дека тоа е невозможно – рекла мајката.
Одложените породувања се екстремно ретки и носат ризик од инфекција. Може да се извршат само во случај кога бебињата не делат иста плацента и доколку контракциите се забават по раѓањето на првиот близнак.

За среќа, откако се родил синот Александар на 27 фебруари, породувањето забавило. На Дасилва ѝ дале антибиотици, додека Александар се борел за живот на Одделот за интезивна нега.

– Докторите ни рекоа дека е добар, дека неговото срце чука добро. Тогаш почнавме да се молиме – вели таткото.

По 24 дена се родил вториот близнак Роналдо. Докторката која се грижела за породувањата вели дека за две декади имала помалку од 10 одложени породувања и никогаш со толкава разлика во времето меѓу нивното раѓање, придружено со позитивен исход за двете бебиња.

Близнаците се родени дури и во различни годишни времиња, едниот е роден во зима, а другиот на пролет.

Тие сѐ уште се во болница, а се очекува да ги пуштат дома на официјалниот термин за породување – на 18 јуни.