Кампања: Гласно против лошите навики

Под мотото: „Препозјан се и засрами се“ Сити радио, Клуб фм и Метрополис радио мрежа, започнаа кампањата „Гласно, против лошите навики“.

Целта на кампањата е во секој човек да се разбуди чувството за одговорност во однесувањето. Лошото, вулгарното или недоличното однесување се повеќе навлегува во „градскиот жаргон“ и станува синдром на младата генерација, но не ретко и на возрасните.

Несоодветното однесување секојдневно се сретнува на улица, дома, на работа, во училиште, во кафеана…

„Радиото ја има моќта, но и улогата на гласник. За се што е ДОБРО ИЛИ ЛОШО да прозива, да  опомени или да пофали. Лошите навики во однесувањето стануваат опасен начин на комуникација кој го иритира и потценува рационалниот и културниот човек. Кампањата не критикува за да навреди, туку посочува за да го поттикне  признанието пред себе, а тоа е позначајно од казната.  Говориме за лоши навики кои почнуваат како шега, за потоа да станат тренд и брзо прифатени од младите. Убаво е да се слушне гласно како некој без да го изговори вашето име ќе  ве натера да се препознаете, но и да се промените. Веруваме дека секој може, тоа е и нашата главна цел, да се промени, да стане подобар и почитувајќи ги другите да се почитува и себе си“ пишува во соопштението од радијата.

Кампањата преку нетипични пораки му се доближува на слушателот и ја поттикнува неговата желба за подобро.

Преку радио џинглови со необична продукциска конструкција и со провокативни текстови со социјален и едукативен контекст, радијата и се обраќаат на публиката, оттука и на индивидуата,  да се препознае и да се коригира.

Секое динамично секојдневие е често обележано со  импулсивност, нетолетанција и вулгарност, но доколку на истото се посочи, може да биде заменето со учтиво и коректно однесување кое еден ден може да испровоцира и нови манири.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.