„Мерцедес“ продолжува со фантастичните изведби на серијата „СЛ“

Во компанијата од Штутгарт за оваа пригода го искористија трилитарскиот мотор со шест цилиндри, во кој се вградени две турбини. Тој веќе е проверен мотор бидејќи е вграден во моделот „Е 400“.

Максималната сила на моторот, кој ги исполнува новите стандарди Евро 6, изнесува 333 коњски сили и е остварлива во работен режим од 5.250 до 6.000 вртежи во минута. Најголемиот обртен момент изнесува 480 њутн-метри и е на располагање од 1.600 до 4.000 вртежи во минута.

Во споредба со капацитетот на неговиот претходник, моторот во „СЛ 400“ е помоќен за 27 коњски сили и нуди дополнителни 110 њутн-метри.

Атрактивниот кабриолет е целосно изработен од алуминиумски легури и со моќниот мотор забрзува до 100 километри на час за 5,2 секунди, што е за 0,7 секунди подобро од неговиот претходник. Максималната брзина е ограничена електронски на 250 километри на час.

Со таквиот режим на работа на мо- торот се намалува потрошувачката на гориво на просечни 7,3 литри на 100 километри, што е за пет проценти помалку од неговиот претходник.

Преносот на силата на моторот се врши преку седумстепен автоматски менувач.

Внатрешноста е изработена од висококвалитетни материјали во комбинација со кожа, кои даваат удобност и уживање при возењето.

Производството на овој модел се очекува да почне оваа пролет, а првите модели треба да се појават на пазарот во Германија во втората половина од оваа година.

Во зависност од опремата што е вградена, почетната цена изнесува околу 100 илјади евра.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.