Врвниот уролог и единствен трансплантолог на бубрег, академик проф. д-р Живко Попов, се приклучува на тимот на „Ре-медика“. Во првата приватна општа болница, проф. д-р Попов ќе биде одговорен за одделението – урологија.
Важи за врвен специјалист, кој речиси целиот свој живот го посветил на установување на пресадувањето бубрези како рутинска метода и лекар со долгогодишно искуство. Основоположник е на Центарот за трансплантација на бубрези при Уролошката клиника, Клинички Центар Скопје каде што се изведени над 265 трансплантации на бубрези од жив дарител меѓу кои 23 кадаверични.
– Да се има едно од најеминентните имиња на македонското здравство во својот тим и еден од пионерите во трансплантацијата во Македонија е чест, придонес кон реномето на болницата, но, исто така, и поттик за целиот тим. „Ре-медика“, секое засилување на тимот, имплементирање на нови методи и услуги и унапредување на апаратурата го прави со цел да биде што поподготвена и поефективна во овозможување на беспрекорна здравствена услуга за граѓаните – д-р Андреја Арсовски, стручен директор на „Ре-медика“.
Во својата биографија д-р Попов уште бележи позиција на национален координатор и шеф на „Македонија трансплант“, координативно тело за трансплантација на органи и ткива при Министерството за здравство. Живко Попов беше дел од тимот кој го изведе првото пресадување на бубрег од пациент со мозочна смрт, пред 26 години.
Д-р Попов има добиено бројни национални и меѓународни награди, републичка награда „11 Октомври” за достигнувања во полето на хирургијата и трансплантацијата на бубрези, Орден за придонес на Француската култура и наука, „Академска палма” (Chevalier dans I Ordre des Palmes Academiques) co декрет на премиерот на Република Франција, Награда „13 Ноември” на Град Скопје за особен придонес во развојот и меѓународна афирмација во доменот на уролошката хирургија и трансплантацијата на бубрези во градот Скопје. Државна награда „23 Октомври“ за достигнувања во областа на хирургијата и науката.
Одделението по урологија во „Ре-медика“ ги нуди сите услуги во делот на урологијата. Се спроведуваат консултативно-дијагностички, ендоскопски и класични, хируршко-уролошки процедури. Оперативните процедури опфаќаат третман на бубрежна калкулоза, ласерска хирургија, лапароскопски процедури, микрохируршки процедури.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
