Груевски: Ќе се гради експресен пат од Штип до Радовиш

Со новата програма ветуваме дека во предвидениот рок од три години ќе заврши изградбата на автопатот од Скопје преку Свети Николе до Штип, вети претседателот на ВМРО-ДПМНЕ Никола Груевски на митингот кој вечерва во Струмица го одржа партијата која ја предводи Коалицијата „За подобра Македонија“.

-Во 2017 ќе започне градбата на експресниот пат со четири ленти од Штип до Радовиш и ќе се спои со новоизградениот пат меѓу Радовиш и Струмица кој значително ја зголеми безбедноста на патувањето во кој вложивме 8 милиони евра за изградба на тие 10 километри – нагласи Груевски.

Лидерот на ВМРО-ДПМНЕ пред струмичани ја промовираше новата програма „Проверено“ за периодот 2014-2018 за која истакна дека е најобемната и најдобрата програма некогаш понудена во Македонија.

-Во новата програма планираме и засилени инвестиции за проширување и рехабилитација за сите постојни хидро системи во државата кои што се запуштени. Направивме десет годишен план и секоја година утврдивме колкав буџет ќе ни треба за десет години, не само да ја обновиме и рехабилитираме мрежата за наводнување, туку да градиме и нови мрежи како примарна така и секундарна и терцијална мрежа за наводнување – посочи Груевски.

Груевски најави инвестициски проекти за наводнување на нови 24.350 хектари земјоделско земјиште на територијата на цела Македонија и истакна дека овој проект ќе се спроведе бидејќи знаат дека тоа во моментов тоа е еден од најгорливите проблеми на земјоделците.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.