Прототип што со нетрпение се очекува на пазарот

Сѐ до почетокот на Саемот во Женева, „Алфа Ромео“ успешно го криеше концептот од очите на јавноста и првите фотографии се појавија по официјалното претставување минатата недела.

Италијанскиот производител успеа своето купе 4C да го претвори во исклучителен, складен и убав кабриолет „4C спајдер“. Дизајнот во најголема мера е преземен од 4C. Цврстиот покрив е заменет со платнен, кој лесно се склопува во багажниот простор, додека зад кабината е вградена заштитна рамка од јаглеродни влакна.

Исто како и кај основниот модел и кај кабриолетот се користени ултралесни материјали за деловите од каросеријата, како што е рамката за предното ветробранско стакло. Поради тоа „спајдер“ е потежок од 4C само 60 килограми, и неговата тежина сега изнесува 955 килограми.

Концептот претставен во Женева има две централни издувни цевки изработени од титаниум и од јаглеродни влакна, кои специјално ги изработи специјализираната фирма „Акраповиќ“. Кабриолетот се разликува од купето и по изработката на куќиштето за фаровите и по новите алуминиумските фелни. Тоа што остана непроменето е моторот, кој како и кај купето е 1,75-литарски бензински мотор со турбополнач, кој испорачува 245 коњски сили со 350 њутн-метри обртен момент. Силата на моторот се пренесува на задните тркала преку шестотепен TCT-менувач со двојна оска, кој освен автоматски има секвенциски режим на работа, а командите се наоѓаат на воланот. Автомобилот забрзува од 0 до 100 километри за 4,5-секунди, а максималната брзина е електроски ограничена на 250 километри на час.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.