Во Градска библиотека ќе се одбележи Светскиот ден на раскажувањето и на детскиот театар

Утре напладне проектот на УСАИД „Со читање до лидерство“ и Градска библиотека „Браќа Миладиновци“ Скопје ќе одржат настан во просториите на библиотеката по повод Светскиот ден на раскажувањето и Меѓународниот ден на театар за деца. Светскиот ден на раскажувањето е глобална прослава на уметноста на усното раскажување. Се прославува секоја година на пролетната рамноденица. Темата за 2014 година е „Приказни за чудовишта и змејови”.

Истиот ден се прославува и Меѓународниот ден на театарот за деца и младинци, па по тој повод, актерите Соња Стамболџиоска и Мартин Јорданоски ќе читаат и раскажуваат приказни на тема чудовишта, змејови, ламји и џинови од богатиот опус на македонски народни приказни. Ученици од прво до трето одделение од неколку скопски училишта заедно со нивните наставници, родители, баби и дедовци се добредојдени да ни се придружат на овој интересен настан.

Проектот на УСАИД „Со читање до лидерство’’ го спроведува Фондацијата за образовни и културни иницијативи „Чекор по чекор’’ – Македонија во соработка со Бирото за развој на образованието и Државниот испитен центар. Активностите кои ќе траат до ноември 2015 година директно ќе опфатат 61 училиште од сите региони на државата, а ОУ „Гоце Делчев“ – Горно Лисиче е едно од училиштата одбрани за учество на овој настан.

Целта на проектот е да се придонесе за подобрување на јазичните и математичките вештини кај учениците од почетните одделенија, зајакнување на педагошките вештини на наставниците и подигање на свеста кај целата заедница за важноста од јазична и математичка писменост во интелектуалниот развој на децата. Низ интересни активности со познати пејачи, актери и останати аниматори, се организираат активности за учениците, нивните родители и целата локална заедница со цел да се претстават читањето и математиката на забавен начин за учениците.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.