Претседателот Ѓорге Иванов вчера ги посети општините Кичево и Струга и оствари средби со жителите од околните села.
Иванов се сретна со жителите на селото Пласница, кои во најголем дел се од турска етничка припадност, а тие изразија поддршка за досегашни активности на претседателот, како и за неговата еднаква посветноста на сите етнички заедници во Република Македонија.
Македонскиот претседател во рамки на посетата на општина Кичево ги посети и жителите на село Другово, а имаше и средба со група стопанственици.
На средбата, претседателот Иванов предложи заеднички настап на бизнисмените, здружување и укрупнување на бизнисот, со цел пробив на пазарот и подобрување на нивната конкурентност.
Претседателот на Регионалната стопанска комора, Игор Соколески, изрази задоволство од интересот на македонскиот претседател за активностите на стопанствениците, за неговите редовни средби со деловната заедница и помошта во нивно поврзување и организирањето на деловни форуми.
Кичевските бизнисмени ја поздравија изградбата на автопатот Кичево – Охрид и се согласија дека вложувањата во патната инфраструктура ќе придонесат за дополнителен развој на кичевскиот регион, со тоа што ќе овозможат подобри услови за развој на бизнисот и ќе го направат попривлечен за инвестиции.
Претседателот Иванов во Кичево се сретна со тимот од НР Кина што ги врши подготовките за изградбата на автопатот Кичево – Охрид, инвестиција вредна 375 милиони евра, чија реализација е значајна не само за југозападниот дел од државата, туку за Република Македонија во целост.
Покрај Кичево, Иванов вчера оствари средба и со граѓаните на Струга, при што ги посети селата Мислешево, Враништа, Лабуништа и село Беровец.
На средбата со претседателот Иванов, стружани се согласија дека е потребно оптимално да се искористат туристичките потенцијали, кои ги нудат убавините на Охридско Езеро и автентичните културни манифестации што традиционално се организираат во Струга.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
