Кинофест „Алгоритам 2014“ – училиштен фестивал на кратки филмови

Гимназијата „Алгоритам“, во соработка со продукциската куќа „Наше маало“, распишува награден конкурс за изработка на краток филм.

Право на учество на наградниот конкурс имаат сите ученици од основните училишта во Република Македонија. Учесниците на фестивалот може да учествуваат со филмови во кој било жанр, на слободна тема, снимени со видеокамера, мобилен телефон или фотоапарат. Изработениот краток филм треба да биде оригинален, да не ги прекршува начелата на авторската сопственост, да не повикува на насилство и нетолеранција. Времетраењето на филмовите не треба да биде подолго од 10 минути.

Со овој фестивал на кратки филмови гимназијата „Алгоритам“ се приклучува на глобалниот тренд за поголема застапеност на кинематографијата во училиштата, како медиум за изразување и поттикнување на креативноста на учениците.

По завршувањето на фестивалот сите пристигнати филмови ќе бидат достапни на интернет-страницата на гимназијата.

Најдобрите филмови ќе бидат наградени, а наградите свечено доделени во просториите на Гимназијата „Алгоритам“.

Информации околу начинот на  аплицирањето, заинтересираните кандидати можат да добијат на интернет-страницата www.algoritam.mk

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.