Кампања за безбедна храна

Градинки, основни и средни училишта, но и граѓани потрошувачи во општините Гази Баба, Кисела Вода, Штип, Прилеп и Гостивар следните две недели ќе бидат дел од кампањата за безбедна храна.

– Активностите ќе се фокусираат на одржувањето лична хигиена, миењето, чувањето и подготвувањето на храната, правилното читање на декларациите и изборот во рестораните, вели Дејан Рунтевски директор на Агенцијата за храна и ветеринарство кој заедно со финансиска поддршка од Јапонската агенција за меѓународна соработка „JICA“ ја спроведува кампањата. Потребата од едукација на потрошувачите за консумирање храна никогаш не е доволна, додава Рунтевски.

Според градоначалникот на Гази Баба Тони Трајковски, во кампањата ќе се едуцираат и вработените во градинките и училиштата кои понатаму практично ќе го продолжат проектот преку секојдневното работење.

-Целта е да ја подигнеме свеста за правилна и поквалитетна исхрана на граѓаните од сите возрасти, потенцира Трајковски.

Доколку бидат обезбедени дополнителни средства, Рунтевски вели дека кампањата ќе се прошири и во други општини.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.