Преку проектот за реконструкција на фасади на значајни објекти од старата градска архитектура, во Гевгелија беше промовирана комплетно реконструираната фасада на библиотеката „Гоце Делчев“, објект што е споменик на културата и кој има посебно место во историскиот развој на Гевгелија.
На претставувањето присуствуваше министерката за култура Елизабета Канческа-Милевска, директорот на библиотеката Драган Хаџи-Николов, градоначалникот на Гевгелија, Иван Франгов, како и многубројни претставници на културниот и на политичкиот живот на градот.
-Многу сум задоволна што, конечно, на овој објект со карактеристична архитектура, со реконструкција на фасадата и другите елементи му е вратен сјајот. Со реализацијата на проектот уште еднаш на дело ја потврдивме нашата заложба за зачувување, обнова и ревитализација на урбаните содржини во повеќе заштитени и други градски целини во Македонија, истакна министерката Канческа-Милевска нагласувајќи дека во минатото биле извршени нестручни поправки и интервенции, кои влијаеле штетно на објектот и за таа цел биле превземени заштитни интервенции и проект за конзервација, санација и реставрација на зградата на библиотеката.
Во оваа библиотека се чува најстариот ракопис на првата книга од Кирил Пејчиновиќ, „Огледало“, објавена во 1816 година во Будим. Таа е неопходна книга – прирачник за свештеникот при вршење на верските обреди. Првиот дел го сочинуваат молитви и верско-обредни текстови на црковнословенски јазик со македонски народни црти, а вториот дел го сочинуваат беседите напишани на тетовски говор со елементи на скопскиот и други македонски говори. Во првиот дел од книгата, Пејчиновиќ дава коментари на Библијата, а во вториот, во беседите, поучува и критикува. Ги напаѓа суеверието и паганските обичаи на народот. Во овој текст, Пејчиновиќ мошне интересно ја поистоветува верата со народноста. И тој како и Крчовски, ги критикува своите колеги-поповите. Им забележува дека себично се здружиле со Турците и го измачуваат сопствениот народ. Неговата просветителска насоченост се согледува во пропагандата на книгите.
-Ова значајно дело од нашиот преродбеник соодветно ќе биде зачувано и заштитено и ќе биде сместено во Музејот или во поставката на градот – истакна министерката.
Истовремено во Гевгелија се реализирани повеќе проекти штовеќе ја остваруваат својата функција, ја збогатуваат културата на локално ниво и создаваат услови за развој на културниот туризам. Така, отворена е сувенирница на граничниот премин Богородица, реконструиран е и стариот Амам во центарот на Гевгелија, кој сега функционира како уметничка галерија во која се изложени делата на Друштвото на ликовните уметници од Гевгелија, а и театарот во овој град доби современа театарска зграда, археолошка поставка со богати експонати и наоди, како и реновираната автентична фасада на Музејот на Гевгелија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
