УМС на ВМРО-ДПМНЕ отворена за размена на идеи, опозициските подмладоци бојкотираа

Претседателот на Унијата на младите сили на ВМРО-ДПМНЕ, Владимир Нелоски, денеска ги собра претседателите на подмладоците на политичките партии во Македонија да се напијат кафе и да поразговараат.

Претседателот на Унијата на млади сили на ВМРО-ДПМНЕ Владимир Нелоски упатил покана до сите подмладоци на политичките партии во Македонија, но поканата не ја прифатиле само опозициските подмладоци.

Кафе средбата пред се беше наменета за дружење, разменување идеи, но се разговараше и за актуелната состојба на политичката сцена, за младинската политика која се води, како и за програмите и политиките на подмладоците на политичките партии.

Беа разменети повеќе идеи помеѓу младите, со цел подобрување на младинскиот стандард и овозможување повеќе можности за напредок и успех на сите млади во државава.

Денешната средба иако наиде на бојкот без никаква причина од страна на опозициските подмладоци, Владимир Нелоски  и останатите претседатели на подмладоците се надеваат дека ќе прејде во традиција, каде што пред се ќе биде пример за сите млади кои припаѓаат на различни партии, дека најважна е дружбата и соработката помеѓу нив и само така може да се дојде до заеднички напредок.

Ова не е прва ваква иницијатива на Унијата на млади сили на ВМРО-ДПМНЕ, во 2011 година тогашниот  претседател на УМС ВМРО-ДПМНЕ Диме Спасов, по своја иницијатива ги покани сите претседатели на подмладоците на политичките партии кај Претседателот на Република Македонија, Ѓорѓе Иванов, да се напијат кафе, да разговараат и да потпишат Меморандум за фер и коректна кампања за парламентарните избори.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.