Западна Европа веќе не ѝ верува на ЕУ

Во Западна Европа владее недоверба кон Европската унија и нејзините институции, изјави гувернерот на Европската централна банка, Марио Драги, во интервју за францускиот неделник „Журнал ду диманш“, пренесе „Курир“.

На прашањето во врска со можното влошување на односот на Европејците кон ЕУ и за исходот од изборите за Европарламентот во мај идната година, Драги истакна дека има очекувања оти во ЕП ќе се формира поголема група противници на Унијата од сегашната.

– Во јавноста владее недоверба кон ЕУ и нејзините институции. Треба да станеме свесни за тоа и да ги преземе сите неопходни мерки. Има популистички партии и групи, кои ја користат оваа тенденција, но и поединци, кои се искрено разочарани од ЕУ – изјави Драги.

Тој нагласи дека на европското население треба да му се појасни зошто заедничката европска валута е фактор на напредок.

– Потребно е да се даде поголемо значење на постоењето на ЕУ и да се појасни дека поголемиот степен на интеграција може да придонесе за економскиот раст и благосостојбата – додаде тој.

Драги напомена дека еврото страда поради тоа што еврозоната не е совршена и не опфаќа доволен број земји.

– Потребно е да се прошири оваа монетарна унија доколку сакаме долгорочно да ја гарантираме стабилноста на нашиот континент. Пред сѐ станува збор за создавање банкарски сојуз, целосно спроведување на програмите за реформи и намалување на државите долгови и буџетските дефицити – нагласи Драги.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.