„Прегор“- ново друштво на Македонци во Албанија

Македонците во Албанија формираа уште едно друштво, „Прегор“,  и тоа веќе е регистрирано во Основниот суд во Тирана. „Прегор“ е со седиште во Подградец а претседател е Петар Шкмби (Спировски), пренесе МИА. Тој најави тесна соработка со огранокот на македонското друштво „Преспа“ за Подградец со цел што подобра интеграција на Македонците од ова подрачје во албанското општество.

– Нашата цел како друштво ќе биде интеграција во институциите на системот во Албанија и зачувување на нашиот македонски идентитет, култура,  јазик, фолклор и обичаи во поширокиот регион на Подградец- изјави Шкмби.

Во Подградец има голема концентрација на Македонци, дел староседелци, дел доселени од охридско-струшкиот регион, дел од областите Мала Преспа, Голо Брдо и Гора. Доселени Македонци има и од селото Врбник, од околијата Девол, како и од повеќе села од околијата Подградец, како Лин, Тушемиште и други села.

Македонците во Албанија се организирани и во друштвата Преспа“, „Илинден“, „Мир“, „Мед“,  „Гора“ и „Мост“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.