Претседателот на регионалниот Сојуз на лозари „Агротиквешија“ од Кавадарци, Љупчо Аризанов, денеска остро ги осуди вчерашните изјави на лидерот на СДСМ, Зоран Заев, за продажбата на токсичните корнишони.
– Ваквото нешто е неразумно во време кога земјава сака да влезе во Европската унија. Со токсичните краставички ѝ е нанесена неправда на целата држава. Нивните производители и извозници се виновни според мене и треба да си ја сносат вината и последиците. Соодветна казна да добијат таквите луѓе кои не се однесуваат спрема европските стандарди. Факт е дека некој направил пропуст, па произвел и извезол токсична стока која не е за употреба и е за поништување. Сметам дека на таквите не им е местото во земјоделството и извозот – рече Аризанов и додаде дека заканите со тужби кон сите оние кои го осудија ваквиот чин со „отровните“ краставички не држат место оти таквата постапка да се извезат токсични земјоделски производи навистина е за осуда.
– Нереално е некој да се заканува со тужби во вакви услови и да ги штити неправилните работи кои му штетат на македонското земјоделство. Оти од случајот со токсичните краставички не патат само земјоделците, пати и целата држава. Неоправдани се реагирањето и заканите со тужби – додава Аризанов.
Земјоделските здруженија се независни и никој нема право да се осмелува да покажува политичка сила над нив. Реакциите кои доаѓале од земјоделските здруженија, а се во корист на земјоделецот, требало да бидат поддржани од сите политички партии, нагласи Аризанов.
– Земјоделците особено треба да внимаваат кога е во прашање каренцата на пестицидите и тогаш кога мешаат повеќе хемиски препарати – истакна претседателот на регионалниот Сојуз на лозари „Агротиквешија“ од Кавадарци, Љупчо Аризанов.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
