Убав подарок за Сполстра од играчите на Мајами

Ерик Сполстра, тренерот на Мајами хит ќе биде кормилар на источната конференција на НБА Ол-стар мечот во Хјустон месецов, а убавиот дар му го врачија неговите кошаркари со победа против Торонто од 100-85. Во НБА, изборот на тренерите за мечот на „сите ѕвезди“ се прави до 3. февруари, а кормиларите на најуспешните екипи ја имаат привилегијата да бидат предводници на двата тима. Мајами со победата против Торонто стана недостижен за второпласираната екипа на истокот, Њујорк никс, што авотматски значи дека Сполстра ќе патува за Хјустон.

Триото кое ќе игра на Ол-стар натпреварот, Џејмс, Вејд и Бош, беше најзаслужно за уверливата победа на Мајами над Торонто и вклучувањето на Сполстра на спектаклот во Хјустон. Леброн даде 30 поени, Бош забележа 28, а Вејд стаса до бројката од 23 поени.

-Среќни сме што Ерик и неговите помошници ке бидат со нас во Хјустон. Ние само го реализиравме планот  што тие го замислија и успеавме да го победиме Торонто – изјави Џејмс. Тој и Вејд се избрани во првата петорка на источната конференција, а Бош ќе биде резерва, иако постои можност и тој да биде стартер по повредата на Ражон Рондо, бекот на Бостон.

И без него Селтикс газат сигурно и против Лос Анџелес клиперс ја забележаа четвртата победа, откако Рондо е надвор од НБА терените. Конечниот резултат беше 106-104 за домаќините од Бостон. Пол Пирс постигна 22 поени и клучна тројка во финишот. Клуч на успехот беше одличната игра на резервите на Бостон кои ги надиграа противниците со 52-29. Кај Клиперс не играше Крис Пол, а Бледсо и Крафорд дадоа по 23 поени, додека Блејк Грифин забележа 3 поени помалку.

Драматично беше и во Детроит во големото дерби со вечниот ривал Лос Анџелес лејкерс. Гостите славеа со 98-97, а одлучи одличната одбрана на Пау Гасол. Шпанецот не му дозволи на Андре Драмонд да погоди од цепелин во последната секунда и да му донесе победа на Детроит. Гасол беше и најефикасен на мечот со 23 поени.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.