МЗТ Скопје: повредени играчи, приведени навивачи

Тренерот на МЗТ Скопје Алеш Пипан се пожали дека не можел во текот на неделата да одржи тренинзи 5 на 5 поради многу повредени во екипата и соопшти дека тоа е главна причина за поразот од Унион Олимпија.

–Во последниот дел од средбата не можевме да им парираме. Беа посвежи и знаеја како да го искористат нашиот хендикеп-рече Словенецот по 10. пораз на МЗТ Скопје во Јадранската лига.

Тој не сака да зборува за амбициите на МЗТ на шест кола до крајот иако е сосема извесно дека шансата за пласман меѓу четирите најдобри е пропуштена.

–Не можеме да зборуваме ниту за амбиции со толку повредени, ниту сега можеме да купуваме играчи. Најважно е дека не сме меѓу последните во лигата, а тоа ни беше првичната цел-соопшти Пипан.

Инаку разочараноста од исходот и поразот од Унион Олимпија (87-76) кај навивачите на Аеродромци кулминираше по завршувањето на средбата кога прво, судиската тројка која премногу грешеше на сметка на МЗТ беше испратена со салва од навреди, а потоа сосема непотребно, дојде и до конфронтација меѓу најжешките и обезбедувачите. Заканата од ескалација ја елиминираа специјалните полициски сили кои реагираа веднаш, а патем задржаа и двајца навивачи на разговор.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.