Венизелос призна: Нападите на туристи од Скопје се организирано и намерно насилство

Evangelos Venizelos (1)

Шефот на грчката дипломатија, за помалку од еден месец, намерно или случајно, го промени мислењето за инцидентите врз македонските туристи во Грција од страна на припадници на Златна Зора, јави дописничката на Канал 5 од Атина. На 28 август оштетувањата на македонските возила Венизелос ги нарече „изолиран инцидент“, а завчера како „дел од организирано и намерно насилство“.

Во одговор на прашањето на пратеничката од Демократската Левица за „контролите“ на Златнозорците на граничните премини, Венизелос минатиот месец рече дека е изолирани инциденти целосно неодобрен и од грчката влада, но ги обвини и македонската влада и македонските медиуми дека имаат свое влијание.

Пред 2 дена пак, говорејќи за радиото Вима, и активностите на неонацистичката партија со друг став.

– Не очекувавме дека ќе стигнеме до оваа крајност и убиство, имавме многу претходни случаи на организирано и намерно насилство. Треба да ве потсетам на нападите на градоначалникот на Атина, случувањата во Мелигала, случувањата против возачите на автомобили или туристи од Скопје, случувањата на грчко албанската граница, безбројните напади на имигранти што се наоѓаат во нашата земја. Што значи дека си имаме работа со една криминална група – рече Венизелос.

Златна зора веќе 15 месеци е дел не само од грчкиот парламент, туку и од грчкото секојдневие, но надлежните секогаш затвораа очи, и пред малтретирањето на македонски возачи, пред контролите на границите, пред оштетувањата на автомобилите на македонски туристи, пред навредите во парламентот, замолчеа и пред погрдното Циганоскопјани на Панајотарос. Прашањето кое се поставува е зошто медиумите ги игнорираа целосно, и дури сега го открија вистинското лице на Златна зора?

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.