Регионалната канцеларија на УНЕСКО во Венеција испратила писмо во кое бара да бидат покриени етикетите, вклучувајќи ги и тие на англиски јазик, кои се однесуваат на Гоце Делчев и на знамето на Крушевската Република, презентирани на изложба во Белград.
Се работи за патувачката изложба „Имагинарен Балкан, идентитетот и сеќавањата во 19 век“, организирана од оваа организација во Белград, пренесува „Њуз.бг“.
Како што наведуваат бугарските медиуми, поради овој „гаф“ бугарскиот национален историски музеј ја напушти изложбата во Белград, а министерот за култура Петар Стојанович изјавил дека изложбата нема да биде дозволена во Бугарија.
Реакцијата на УНЕСКО, кој е организатор на изложбата, доаѓа еден ден по острата реакција од бугарската страна, изразена преку бугарскиот министер за култура Стојанович и директорот на националниот историски музеј, Божидар Димитров.
– Задоволни сме што се постигна разумно решение по обидот за фалсифукување на бугарската историја. Мило ми е што навремено се реагираше и Министерството за култура заедно со националниот музеј на историјата го заштити националниот интерес. Сакам да истакнам дека бугарската влада ќе продолжи да го бара патот на дијалогот и разбирањето, без да стане жртва на компромис со нашата национална историја – изјавил бугарскиот министер Петар Стојанович.
Според Димитров, пак, познат по постојаните провокации упатени кон Македонија, оваа наредба на регионалната канцеларија на УНЕСКО претставува успех на бугарското Министерство за култура, кое решително се изјаснило против двата фалсификата на бугарската историја.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
