Сопругата на Асад, Асма влезе во медиумска војна

Главна ѕвезда на профилот на Инстаграм е убавата жена на Асад – Асма, која се смешка и позира додека им помага на младите Сиријци.

Сирискиот претседател, против кого се стегнува обрачот поради наводната употреба на хемиско оружје, почнува нова војна – овојпат медиумска, во која главно оружје е неговата сопруга.

Како што пишува Еј-би-си њуз, сириското претседателство неодамна отворило профил на Инстаграм, каде што објавува слики од секојдневниот живот на претседателот Башар ал-Асад и првата дама. Но овие фотографии покажуваат некој друг живот во Сирија, каде што нема војна, нема крв, нема мртви тела.

Се поставува прашањето зошто се прави сето тоа?

Еј-би-си њуз одговара дека со фотографиите очигледно се сака да се покаже дека Сирија е во добри раце. Главна ѕвезда на профилот на Инстаграм е убавата жена на Асад – Асма, која се смешка и позира додека им помага на младите Сиријци.

Асма отсекогаш ѝ била интересна на сириската, но и на светската јавност. Таа беше препознаена како многу модерна и образована дама. Родена е во Сирија, но поголем дел од животот има поминато во Лондон како „Ема“, каде што студирала и добила работа во Дојче банк пред да се сврши со Асад и да се пресели во Сирија.

Кога почна војната во Сирија, Асма се повлече од јавноста, и многумина се прашуваа дали е против нападите врз бунтовниците што ги наредува нејзиниот сопруг. Но таа мошне брзо се појави до него – насмеана. И покрај крвавите жртви, во последниве недели Асма исто така се појавува насмеана на фотографии, опкружена со деца и сириски жени, делејќи им храна на оние што загубиле сè