Активни пожари кај Осломеј, Македонски Брод и Велешко

Кај селото Осломеј, Кичевско и во општината Македонски Брод има активни пожари кои, како што соопшти Дирекцијата за заштита и за спасување, се очекува во текот на денот да бидат локализирани.

На територија на општина Кичево, кај селото Осломеј вчера се појави пожар на непристапен терен, со кој е зафатена нискостеблеста шума.

Поради непристапноста на теренот гасењето од копно е оневозможено и по барање на градоначалникот на општина Кичево, Дирекцијата за заштита и за спасување утринава во 6.40 часот се активирани двата противпожарни авиона „ер трактор“ за да се локализира пожарот и да не се дозволи да се прошири.

Во Македонски Брод вчера се појави пожар за кој, според последните информации, на подрачната единица на Дирекцијата за заштита и спасување нема потреба од ангажирање противпожарни авиони. За локализирање на пожарот се анагажирани околу 40 лица од ЈП „Македонски шуми“ и Територијална противпожарна единица.

Се очекува во текот на денот пожарите да бидат локализирани.

Вчера избувнал пожар и во општината Чучер-Сандево, на потегот кон Блаце, но тој е локализиран.

Вчера напладне на планината Мукос, веднаш над Степанскиот манастир во Велешко, избувна силен шумски пожар.

Диме Андонов од Шумското стопанство „Бабуна“од Велес информира дека според првичните информции нема опасност по манастирот и по селото. Екипи се пуштени на терен.

Инаку, по вчерашното привремено локализирање на пожарот над селото Мелница на Мелничка Планина во реонот на Чашка пожарот денеска е повторно активен. На терен во негово локализирање се десетина вработени од ШС „Бабуна“ од Велес и локалното население од селата Мелница и Горно Врановци.

Најголем дел од површините под пожар е со папрат, а во помал е бука и нискостеблеста шума, но последиците по животната средина ќе бидат големи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.