Просечната плата во обновена СФРЈ би била 1.357 евра

На Денoт на Републиката, 29 Ноември, кога пред 75 години на Второто заседание на АВНОЈ беше создадена Социјалистичка Федеративна Република Југославија, австрискиот магазин „Космо“, туражен месечник наменет за многубројните ексју иселеници во Австрија, објави текст за тоа што би било кога денес би се обновила државата што се распадна во 1991 година.

Анализата на „Космо“ се темели на пет факти засновани на претпоставки од експерти.

1. 21 милион жители

Толку луѓе би живееле денес во Југославија, во случај и Косово да ѝ припаѓа и заедницата. Ова би ја направило Југославија една од десетте најголеми земји во Европа – поточно, осма најголема земја. Тоа би биле 2 милиона жители помалку отколку во 1991 година, кога СФРЈ имаше 23 милиони жители. Кога станува збор за етничката структура, во неа денес би живееле 35 проценти Срби, 20 отсто Хрвати, 11 отсто Албанци, 9 отсто Бошњаци, 8 отсто Словенци, 6 отсто Македонци, 1 отсто Црногорци и 10 отсто останати.

2. Годишна просечна плата: 16.291 евра

Просечниот граѓанин на обновена Југославија би имал годишна плата од 16.291 евро или околу 1.357 месечно. Реунификацијата во овој поглед посебно би им се исплатела на Косовците, Бошњаците, Србите, Македонците и Црногорците. За да се докаже ова, само примерот на Македонија е доволен: таму просечната месечна плата изнесува 399 евра.

3. Посилна економска позиција

Бруто-националниот производ на новоспоената Југославија би изнесувал 191,045 милијарди долари. Ова би ја ставило Југославија на 53. место во светот по силата и на големината на економијата.

4. Југославија како европски играч

Дека Југославија имаше да каже многу повеќе како држава и денес ќе имаше главна улога на преговарачките маси на Европа и во светот, убеден е и познатиот американски политиколог Фил Батлер. Тој тврди дека Југославија денес би била една од централните држави во Европа и оти со Југославија би преживеало движењето на неврзаните. Како резултат на тоа, Европска унија не би имала ‘монопол’ во Европа и би имала помалку да каже геополитички. Батлер е поддржувач на тезата дека распаѓањето на Југославија од страна на Запад – особено со мотивот за слабеење на една силна држава – е намерно промовирано.

5. Спортската моќ во светот

Кога повторно би имало југословенски репрезентации и спортисти кои би се натпреварувале под југословенското знаме, тогаш Југославија, несомнено, би била меѓу првите пет спортски сили во светот. Јасно е дека Југославија би била апсолутна светска сила, особено во екипните спортови, како што се кошарка, фудбал, ватерполо и ракомет. Ова може да се докаже со успехот на Хрватска на Светското првенство во фудбал и на Србија само на кошаркарските турнири.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.