Почнува осмата Недела на дизјан во Скопје

Осмото издание на Недела на дизајнот во Скопје почнува денеска, а ќе трае до 25 ноември. Овогодинешната платформа се одржува во Центарот за дизајн и иновации „Јавна соба“ и во галеријата „Лукс“.

Оваа година земја фокус е Германија, а ќе се претстави со 12 светски познати дизајн студија, како и отворени презентации на дизајнери.

Меѓународната изложба ЕКСПО годинава ја сочинуваат осум компании од Македонија, 15 млади дизајнери од регионот и две дизајн Академии од Белград со прототипови од маси, столови, штендери, клуб-маси, расвета, фотелји, радијатори, како и декоративни елементи.

На Неделата на дизајнот ќе има и богата музичка програма.

Ќе се одржи и гастрономско катче каде свое кулинарско шоу ќе има популарниот белгиски мастер шеф Марк де Јонг, кој ќе готви заедно со поетесата Марта Маркоска, актерката Ирена Ристиќ и модните менаџери.

На 24 и 25 ноември ќе се одржат две детски работилници на тема „Шумски животни“.

Ќе бидат изложени и производи од експерименталната работилница за дизајн на производи, каде македонски дизајнери и архитекти заедно со осум мастер студенти од Факултетот за продукт и моден дизајн при Универзитетот за уметност во Берлин, предводени од познатата дизајнерка Инекс Ханс, заедно со архитектката Анета Поповска и виртуозот за плетење трска на разбој Петар Благојевски создаваат нови дизајн решенија за домаќинство и угостителство.

Неделата на дизајнот во Скопје е дело на Јавна соба – Центар за дизајн и иновации, во соработка со Делегацијата на германското стопанство со канцеларија во Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.