Ѓорчев се обрати во Сенатот на Шпанија, на конференцијата настапи под Уставното име Република Македонија

Пратеникот на ВМРО-ДПМНЕ и шеф на делегацијата во парламентарното Собрание на ОБСЕ, Влатко Ѓорчев се обрати на конференцијата за борба против тероризмот и жртвите на тероризмот која што се одржува во Сенатот на Шпанија, соопштуваат од ВМРО-ДПМНЕ.

Пратеникот во своето обраќање истакна дека тероризмот претставува закана за слободните општества и за демократиите, како и за целиот свет.

Ѓорчев истакна дека Македонија се придружи во меѓународната коалиција за борба против тероризмот и дека припадниците на АРМ активно учествуваат во меѓународните безбедносни мисии.

Ѓорчев нагласи дека треба да продолжи меѓународната соработка за борба против тероризмот, особено во делот на размена на информации помеѓу земјите кои заеднички се борат против тероризмот.

Истовремено, треба да се засили соработката со локалните заедници во насока на спречување на радикализацијата на младите луѓе. Вложувањето во образованието, можноста за вработување на младите и демократскиот амбиент се силен инструмент на демократските општества во борбата против тероризмот.

Пратеникот Ѓорчев ги поздрави присутните семејства од Шпанија, САД, Франција и Белгија кои биле жртви на тероризмот, додавајќи дека и Македонија има свои жртви и сеќавања.

На крајот, пратеникот Ѓорчев учествуваше во церемонијата на положување на цвеќе и одавање на почит на жртвите на тероризмот.

На конференцијата пратеникот Ѓорчев учествуваше и настапи под Уставното име Република Македонија, кое што го користеше во сите свои обраќања и за време на сите билатерални средби.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.