Столтенберг се сретна со Џафери и со координаторите на пратеничките групи

Генералниот секретар на НАТО Јенс Столтенберг денеска во Собранието имаше средба со претседателот на законодавниот дом Талат Џафери.

На средбата присуствуваа координаторите на Пратеничките групи во Собранието, Соња Мираковска, Драган Данев, Ејуп Алими и Африм Гаши, како и претседателот на Комисијата за одбрана и безбедност, Хари Локвенец.

Џафери, соопшти собраниската прес-служва, изрази голема благодарност до генералниот секретар Столтенберг за неговиот личен ангажман и поддршка на Република Македонија во добивањето покана за полноправно членство во НАТО на Самитот во Брисел. Истакна дека Република Македонија посветено работи на исполнувањето на реформската агенда, преку годишните планови за членство, но и со усвојувањето на Стратегискиот одбранбен преглед, кој предвидува модернизација на Армијата и на целокупната одбрана на Република Македонија. Фокусот на активностите паралелно е насочен и во градењето и негувањето конструктивен дијалог со соседите и решавање на отворените прашања, како предуслов за индивидуален напредок, но и придонес кон регионалната стабилност.

Претседателот на Собранието изрази надеж за успех на референдумот и очекување дека граѓаните ќе ја потврдат својата определба за членство на Република Македонија во Европската Унија и НАТО, бидејќи на референдумот треба да се гледа како на патоказ кон иднината, а не поглед во минатото. Во контекст на севкупните напори на Република Македонија да ја достигне целта – полноправна членка на НАТО Алијансата, голем придонес има и парламентарната димензија, за што сведочи одржувањето на успешниот Рос-Рот семинар во Скопје, непосредно пред Самитот на НАТО.

Генералниот секретар Столтенберг го поздрави потпишувањето на Договорот со Грција и ја подвлече натамошната поддршка на НАТО во исполнувањето на реформските процеси, а особено изрази задоволство од донесувањето на Стратегискиот одбранбен преглед. Нагласи дека за финализирање на процесот, е потребна ратификација во Парламентите на сите 29 земји членки на Алијансата, која ќе се реализира откако ќе бидат завршени сите обврски поврзани со имплементацијата на Договорот, односно донесувањето на уставните измени. Свесен е дека тоа се чувствителни прашања за двете држави, но верува во позитивното заокружување на овој процес. Тој истакна дека Алијансата не присилува ниедна држава да стане нејзина членка, таа ќе ја почитува суверената одлука на граѓаните на претстојниот референдум, позитивна или негативна, но предочи дека влегувањето во Алијансата секогаш носи големи придобивки за граѓаните, не само од безбедносен аспект, туку и економски бенефит, пораст на странските инвестиции и долгорочна општествена стабилност, соопшти прес-службата на Собранието на Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.