Вонредна вест: Жителите на Ново Село затворени во домовите поради престрелка меѓу две криминални групи

Струмичко Ново Село вечерва е претворено буквално во „Дивиот Исток“. Сѐ уште може да се слушнат престрелки, откако пред половна чaс жители на селото Бадолен од општина Ново Село известија дека се случила страшна престрелка меѓу две групи.

Тревогата е вклучена и кај бугарската полиција, којашто ја зголемила борбената готовност на својата погранична единица. Паника од мафијашките пресметки има и од двете страни на границата. Локалното население информира дека најверојатно станува збор за криминални групи кои се занимаваат со прекуграничен шверц на цигари.

Како што велат мештаните, престрелката се случувала во близина на поседот, или како што го нарекуваат „ранчот“, на градоначалникот на Ново Село од редовите на СДСМ, кој исто така е забележан како се движи во областа следен од две возила и нему блиски лица, а во насока на местото каде што се одвивала престрелката се упатиле бројни полициски сили и амбулантни возила, како и лично началникот на полицијата.

Граѓаните се преплашени и очекуваат информации од полицијата за престрелката. Како што изјавуваат, сите се затворени во своите домови и стравуваат за својата безбедност

Според информации на порталот Инфомакс, постоеле сериозни индиции дека градоначалникот можно е да е инволвиран во нелегални активности. Непотврдени информации говорат дека бил предмет на полициски истраги, но пријави биле процесуирани против неговата сопруга и роднини кои фигурирале како управители на фирмите. Наводно тој успевал да се прикрие, а истрагите прекинале по доаѓањето на власт на СДСМ и влегувањето на Оливер Спасовски во Министерството за внатрешни работи. Неофицијално, вечерва бил уапсен на Камен 29, фатен со два џипа полни со цигари.

Градоначалникот Боро Стојчев важи и за близок пријател со премиерот Зоран Заев, но од друга страна и на актуелниот директор на Бирото за јавна безбедност, кој се смета за човек на вицепремиерката Радмила Шекеринска, и кој наводно знаел да постапува и надвор од насоките на ресорниот министер Оливер Спасовски

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.