Белград ќе ги отстранува спомениците на УЧК во Прешево

Во согласност со Законот за воени меморијални објекти, најверојатно, од есен ќе бидат отстранети сите споменици во Србија што им се подигнати на освојувачите, воените злосторници и на терористите. Во иднина нема да биде прифатена ниедна иницијатива, која ги навредува верските и националните чувства и ги величи фашистите и сепаратистичките идеи, пишува „Вечерње новости“.

За отстранувањето на некој споменик ќе одлучуваат државните институции, а први на листата се спомен-плочата на Аќиф Ефенди во Нови Пазар и спомен-обележјата на т.н. Ослободителна војска на Прешево, Бујановац и Медвеѓе, кои се поставени во Прешево. Весникот објавува дека списокот на недостојни личности е долг, а повеќето од нив се наоѓаат на југот на Србија и во Војводина.

Сите предлози ќе бидат разгледувани на Советот за негување на традицијата на ослободителните војни, кој ќе биде формиран кон средината на август, а во согласност со Законот за воени меморијални обележја. Државниот секретар во Министерството за труд, вработување, боречки и воени прашања Негован Станковиќ вели дека членовите на ова тело се најстручни и во него ќе се најде еден професор по предлог од универзитетите, претставник на САНУ и од Заводот за заштита на споменичната култура и вработени во државната управа.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.