Коце Трајановски: Додека бев градоначалник зелените и паркобраните беа многу гласни и активни, а сега како да го изгубија гласот!

Поранешниот градоначалник на Скопје, Коце Трајановски реагираше на обвинувањата на Шилегов дека ги исекол здравите дрвја. Тој на својот Фејсбук профил напиша дека Секторот за комунални работи изготвува решенија за сечење на дрвја по неколку основи. Го пренесуваме неговото обраќање во целост:

Господине Шилегов, читам дека многу често ме напаѓате и барате оправдување преку мене.

Денеска читам “Коце ги исече здравите дрвја а ми ги остави болните дрвја”. Тоа не е вистина.

Со ова сакате да ме направите дрвосечач на здрави дрва, а Вие да се претставите како човек кој мора да исече болните дрва. За да биде појасно ќе ја образложам постапката на сечење на дрва.

Градот Скопје, т.е Секторот за комунални работи изготвува решенија за сечење на дрвја по неколку основи:

1. На барање на инвеститор кој приложува градежна дозвола за изградба на објект издадена од некоја скопска општина. Градот Скопје има обврска да издаде решение за сечење на дрвја кои се во градежната парцела. Инвеститорот сам го организира и го врши сечењето.

2. На барање на граѓаните ако дрвата им навлегуваат во тераси, балкони, оштетуваат кровови или се суви дрва. При ова ако нема опасност по објектот се врши само кастрење на гранки. За ова решенијата се доставуваа во ЈП „Паркови и зеленило“.

3. На барање на ЈП „Паркови и зеленило“, ако нивните вработени согледаат дека има стари, болни или дрва кои претставуваат опасност да паднат од разни причини.

Изготвените решенија се доставуваа во ЈП „Паркови и зеленило“ за реализација.

Кога ме избраа за градоначалник имаше решенија за сечење на неколку илјади дрвја за кои се чекаше по неколку години да се реализираат. За ова во првиот период имаше многу поплаки од граѓаните. ЈП „Паркови и зеленило“ имаа едно возило со корпа која служеше за подигнување на работникот кој сече на 6 до 7 метри и имаа вработено тројца луѓе. Затоа набавивме уште две возила со корпи и вработивме уште 6 работници. Со ова дојдовме до ситуација откако ќе се добие решение, истото да се реализира за максимум 1 месец, а не како порано неколку години. ЈП „Паркови и зеленило“ откако ќе ги добие решенијата прави план на приоритети.

Како градоначалник, јас никогаш не сум им забранил да ги сечат болните и старите дрва, туку реков дека не смеат и не треба да сечат без претходно неколку дена преку медиумите да ги известат граѓаните на која локација кои дрва ќе ги сечат, како и за причината поради која ќе ги сечат.

Додека бев градоначалник зелените и паркобраните беа многу гласни и активни, а сега како да го изгубија гласот.

Јас моите обврски ги извршував професионално и одговорно, за тоа ќе ви кажат и вработените. Од тие причини, апелирам да ја вршите функцијата на која сте и престанете да барате оправдување кај други.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.