Либерија го повлече признавањето на независноста на Косово

Министерот за надворешни работи на Либерија Гбезонгар Милтон Финдли му врачи вчера на шефот на српската дипломатија Ивица Дачиќ нота со која Либерија ја информира Србија дека го поништила своето признавање на независноста на Косово.

Дачиќ изјави дека одлуката на Либерија е многу важна за Србија, бидејќи покажува дека процесот и дијалогот сѐ уште траат.

Во нотата пишува дека таа одлука ќе остане на сила сѐ до завршувањето на преговорите под покровителство на ЕУ за нормализација на односите на Белград и Приштина.

Либерија го признала Косово врз основа на сознанието дека Белград не е спремен да преговара со јужната покраина, се наведува во нотата која беше претставена на конференција за новинарите на Дачиќ и Финдли.

Се додава дека Либерија ќе го почитува договореното меѓу Белград и Приштина, и ќе гласа во корист на договореното решение во Обединетите нации.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.