Таткото на НБА – ѕвездата Енес Кантер е терорист

Судот во Турција покрена обвинение против таткото на НБА кошаркарот Енес Кантер, Мехмед, во кое го обвинија дека е член на терористичка организација, јави турската новинска агенција „Анадолија“.

„Анадолија“ наведе дека е завршена истрагата околу Мехмед Кантер и дека судските обвинители бараат да се прогласи за виновен и осуди на затворска казна од пет до десет години. Сепак, не е наведено кога ќе започне судењето во западната провинција Текирдаг.

Според овој извор, повозраскиот Кантер, кој е професор, е обвинет дека контактирал со околу 120 осомничени за наводни врски со проповедникот Фетулах Ѓулен. Тој беше исфрлен од јавната служба по неуспешниот пуч, и беше пет дена во притвор минатото лето.

Енес Кантер, кошаркарот на Њујорк, е поддржувач на турскиот проповедник, Фетулах Ѓулен, кој живее во САД и е обвинет од турската влада за организирање на неуспешен државен удар во 2016 година. Ѓулен ги негира овие обвинувања.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.