Што предвидува протоколот за денеска? Кој ќе потпише, кој ќе го даде ручекот, кој ќе биде сведок?

Денес, со почеток во 9.40 по македонско или 10.40 часот по грчко време во преспанското село Нивици или Псаридис, (на грчки), ќе започне цермонијата на потпишување на договорот помеѓу Македонија и Грција.

Од Владата соопштија дека министрите за надворешни работи на Македонија и Грција, Никола Димитров и Никос Коѕијас ќе го потпишат конечниот договор за решавање на спорот за името и за стратегиско партнерство меѓу двете земји.

Претседателот на Владата на Република Македонија, Зоран Заев, ќе ја предводи делегацијата на Владата на Република Македонија. Во македонската делегација, ќе бидат и замениците претседатели на Владата на РМ, министерката за одбрана Радмила Шекеринска Јанковска, министерот за европски прашања Бујар Османи и министерот за внатрешни работи Оливер Спасовски.

Во Псарадес ќе бидат пречекани од претседателот на Владата на Република Грција, Алексис Ципрас и од грчката владина делегација. Димитров и Коѕијас ќе го потпишат договорот, заедно со медијаторот во преговорите, амбасадорот Метју Нимиц. На делот од заедничкиот настан на свечената церемонија во Република Грција, свои обраќања ќе имаат премиерите Заев и Ципрас.

Според агендата на настанот, официјалната средба на двете делегации потоа ќе продолжи на македонската страна на Преспа, во Отешево, каде што двете делегации ќе имаат билатерален разговор и свечен ручек.

За време на целата церемонија, и во Република Грција и во Република Македонија, ќе присутсвуваат потсекретарката за политички прашања на Обединетите нации, Розмари Ди Карло, Високата претставничка за надворешни работи и безбедносна политика на Европската Унија и заменик-претседателка на Европската комисија, Федерика Могерини, и Комесарот за европска соседска политика и преговори за проширување на Европската Унија, Јоханес Хан.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.