Признание за полицајците кои ги бранеа Заев и Спасовски на крвавиот четврток

Полицајците Сашо Тасевски, Ацо Ангеловски и Љупчо Јаневиќ добија признанија од МВР на Денот на македонската полиција што беше организирано на стадионот во Штип.

Тројцата полицајци на минатогодишниот „крвав четврток“ на 27 април како дел од обезбедувањето ги бранеа премиерот Зоран Заев, актуелниот министер за внатрешни работи Оливер Спасовски и останатите пратеници од парламентарното мнозинство при упадот на толпата во Собранието на РМ.

Признанијата им беа доделени во Штип каде што се прославуваше Денот на Полицијата, а се обратија Спасовски и Заев, додека наградите ги врачуваше заменик-министерот во МВР, Агим Нухиу, инаку тогашен прв човек на полицијата за време на упадот во Собранието.

По смената на власта, Тасевски беше назначен за началник на Одделот за обезбедување, или т.н. Шеста управа во МВР, Ангеловски беше поставен на чело на Секторот за превентивно обезбедување во МВР, а Јаневиќ началник на Единицата за обезбедување на Зоран Заев.

На стадионот во Штип пред публиката се изведуваа показни вежби и беа претставувани опрема и реквизити.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.