Запленети и уништени 300 кг затруени пирошки

Инспекциските служби на Агенцијата за храна и ветеринарство, вчера доцна попладне заплениле и уништиле околу 300 килограми небезбедна храна (смеса за подготовка на пирошки и јајца) затекнати при инспекциската контрола во објект кој не е одобрен и регистриран од Агенцијата.

Спроведената истрага утврдила дека небезбедните пирошки кои предизвикале дополнителни труења со храна, во Штип и во Кочанско, се произведувале нелегално, во домашни услови, во објект кој се наоѓал непосредно над операторот со храна ДПТУ „Гицов“ ДООЕЛ од Кочани, кој на 25 април беше затворен од Агенцијата за храна и ветеринарство и Државниот санитарен и здравствен инспекторат.

Небезбедните производи се повлечени и уништени, а меѓу нив се и пирошките кои биле дистрибуирани на пазарот.

„Со одземањето, спречувањето на нелегалното подготвување и дистрибуирање на небезбедните пирошки и нивно нештетно уништување под надзор на инспектор за храна, затворена е истрагата за овој случај на труење со храна, за што сторителот на делото ќе биде прекршочно и кривично гонет од страна на надлежните државни органи“, соопшти Агенцијата, која јавно се заблагодари на граѓаните за соработката при решавањето на овој случај.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.