Реал Мадрид е првиот финалист сезонава во Лигата на шампионите

Реал Мадрид е првиот финалист сезонава во Лигата на шампионите, откако во полуфиналето го елиминираше Баерн Минхен, со гостинска победа од 1-2, односно реми од 2-2 пред своја публика вечерва во реваншот.

Прв во водство дојде Баерн со голот на Кимих во третата минута, но Реал со погодокот на Бензема осум минути подоцна израмни на 1-1, со тој резултат се замина на паузата.

По неполна минута игра во вториот дел Бензема со својот втор гол на мечот му донесе пресврт на Реал Мадрид, по невнимателноста на Толисо и аматерската реакција на Улрих. Баерн со голот на Родригез во 63. минута израмни на 2-2 а Колумбиецот кој настапува како позајмен токму од редовите на шпанскиот тим се извинуваше до фановите на Реал Мадрид.

Реал Мадрид својот противник во големото финале ќе го дознае утре вечер кога Рома и Ливерпул го играат реванш мечот, откако англискиот тим во првата пресметка славеше со убедливи 5-2.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.