Фотографија на човек во пламен во Венецуела – победник на „Ворлд прес фото“ за 2018

Фотографија на човек обвиткан во пламен за време на протестите во Венецуела ја доби наградата „Ворлд прес фото“ за 2018 година.

Авторот на фотографијата „Венецуелска криза“, Роналдо Шемит како награда доби 10.000 евра.

Шемит, кој е роден во Венецуела, работи за Франс прес и живее во Мексико.

На фотографијата на Шимит е прикажан 28-годишниот Хозе Виктор Саласар Балса за време на протестите против венецуелскиот претседател Николас Мадуро во Каракас во мај 2017 година.

Балса, кој на снимката е со гас маска, е фотографиран обвиен во пламен по експлозија на резервоар на мотор. Тој досега се опорави од изгорениците од прв и втор степен.

Фотографијата, која е избрана во конкуренција на пет други дела, фасцинира со „енергијата и динамиката” и е симбол на „запалената Венецуела“, се наведува во образоложението на наградата.

Покрај Шемит, наградени се уште 42 фотографи во осум категории. На конкурсот учествуваа повеќе од 4.500 автори со над 73 000 фотографии.

Најдобрите фотографии ќе бидат прикажани на изложби во 45 држави.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.